Same

Chapter 89

Au na seretaka na yalololoma i Jiova me sega ni mudu; E na gusuqu, au na vakaraitaka na Nomuni yalodina ki nai tabatamata kecega.
2 Me vaka au sa tukuna oti, "Ena tarai cake na yalololoma me sega ni mudu; na Nomuni yalodina o Ni na vakadeitaka ena veiyasana vakalomalagi."
3 "Au sa cakava na veiyalayalati kei ira na Noqu digitaki, Au sa yalataka vei Tevita na Noqu tamata:
4 'Na vuamu, Au na vakataudeitaka me sega ni mudu, na nomu i tikotiko vakaturaga me na yacova nai tabatamata kecega. Sela.'"
5 Na lomalagi ena vakacaucautaka na Nomuni totoka, I Jiova; na Nomuni dau dina talega, ena kedra maliwa nai soqosoqo ni Nomuni digitaki.
6 O cei sa tiko mai lomalagi me vakatautauvatataki vei Jiova? Se, o cei vei ira na luve ni qaqa, e rau sa tautauvata kei Jiova?
7 Na Kalou me rerevaki vakalevu sara e nai soqosoqo ni Nona digitaki, ka me vakarokorokotaki vei ira sa tiko vakavolekati koya.
8 I Jiova na Kalou ni lewevuqa, o cei sa qaqa me vakataki Kemuni, i Jiova? Sa vakavolivoliti Kemuni na Nomuni yalodina.
9 O Ni sa lewa na wasawasa cudrucudru, ni sa tubu mai na kena biau, oi Kemuni ga sa vakamaravutaka.
10 O Ni sa vorolaki Reapi sara vakalalai, me vaka e dua sa vakamatei; o Ni sa vakasesei ira na Kemuni meca ena Ligamuni kaukauwa.
11 Sa Nomuni o lomalagi, o vuravura talega sa Nomuni, o vuravura kei na ka kecega sa tu kina o Ni sa tauyavutaka.
12 Na vualiku kei na Ceva o Ni sa tauyavutaka; o Tepori kei Erimoni, e rau sa rekitaka na Yacamuni.
13 Sa tiko vei Kemuni na Liga sa kaukauwa sara, Sa rui kaukauwa na Ligamuni, Sa rui cecere na Ligamuni i matau.
14 Na dodonu kei na lewa donu sai koya na yavu ni Nomuni i tikotiko vakaturaga; Na yalololoma kei na dina sa lako voli e Matamuni.
15 Sa kalouvinaka o ira na tamata era sa kila na rorogo vinaka oqo! I Jiova, era sa lako voli ena rarama kei na i serau ni Matamuni.
16 Na Yacamuni, era na rekitaka ena siga taucoko kei na Nomuni yalododonu, era sa laveti cake kina.
17 Ni sai Kemuni nai ukuuku ni nodra kaukauwa kei na Nomuni veitokoni, sa laveti cake kina na neimami kaukauwa.
18 Sa Nona na Kalou na neimami sasabai, na neimami Tui na ka Tabu ni Isireli.
19 O Ni sa vosa ena raivotu vei koya na Nomuni ka Tabu ka tukuna, "Au a vukei koya sa kaukauwa sara; au sa vakacerecereya e dua sa digitaki mai vei ira na tamata.
20 Au sa kunea na Noqu tamata o Tevita; ena Noqu waiwai tabu, Au sa lumuti koya kina,
21 Vei koya, ena vakadeitaka na Ligaqu; Na Ligaqu talega ena vakaukauwataki koya.
22 E na sega ni rawa ni qaqa vua na meca, se, me ra vakamavoataki koya rawa na meca.
23 Au na vakadavori ira kece na kena meca e matana, ka vakatu vakaduataki ira sa cati o ya.
24 "Na Noqu dau dina kei na Noqu yalololoma ena tiko vata kei koya, ia, ena Yacaqu ena laveti kina na nona kaukauwa.
25 Au na dodoka na ligana ki na wasawasa, na ligana i matau ki na veiuciwai.
26 Ena tagi mai vei au o koya, 'Oi Kemuni na Tamaqu, na noqu Kalou, kei na vatudei ni noqu vakabulai.'
27 Au na vakayacori koya na Noqu ulumatua, me cecere duadua vei ira na tui e vuravura.
28 Na Noqu yalololoma, Au na maroroya vua me kua ni mudu, na Noqu veiyalayalati sa tudei tikoga vei Koya.
29 Na Nona kawa ena tudei tikoga me sega ni mudu, kei na Nona i tikotiko vakaturaga me vaka na veisiga vakalomalagi.
30 "Kevaka era sa besetaka na luvena na Noqu i vunau ka ra sa sega ni muria na noqu lewa,
31 Kevaka era sa voroka na Noqu i lesilesi ka sega ni maroroya na Noqu i vunau,
32 Io, Au na totogitaka na nodra talaidredre ena kuita, kei na nodra caka cala e nai wau.
33 Sa dina sara na Noqu yalovinaka, Au na sega sara ni kauta tani mai vua, se vakatara na Noqu yalodina me yali vua.
34 Au na sega ni voroka na Noqu veiyalayalati se veisautaka na vosa sa lako oti mai na Gusuqu.
35 Na ka Au sa yalayala oti kina ena Noqu savasava e tabu sara; Au na sega ni lasu vei Tevita.
36 Na nona kawa ena tudei ka sega ni mudu, Na nona i tikotiko vakaturaga, ena vaka na matanisiga e Mataqu;
37 E na vakataudeitaki me sega ni mudu me vaka na vula, ia me vaka nai vakadinadina daudina ni lomalagi." Sela
38 Ia, o ni sa biuti au ka sega ni taleitaki au, o Ni sa cudruva na Nomuni lumuti.
39 O Ni sa cata na veiyalayalati kei koya na Nomuni tamata; o Ni sa vakawaletaka na nona i sala vaka Tui, ena Nomuni viritaka ki na qele.
40 O Ni sa basuka kece na nona bai kei na nona bai vakaivalu kaukauwa o Ni sa vakacacana kece.
41 O ira kece sa lako sivia, e ra sa butakoci koya, e sa ka ni veiwali o koya vei ira na kai nona.
42 O Ni sa laveta cake na ligadra i matau na kena meca; o Ni sa vakamarautaki ira na meca.
43 O Ni sa vukica lesu na nona i seleiwau ka sega ni vukei koya e nai valu.
44 O Ni sa vakaotia na nona lagilagi, na nona i sala vakatui, o Ni sa viritaka ki na qele.
45 O Ni sa vakalekalekataka na nona yabaki vakacauravou; o Ni sa ubi koya ena madua. Sela.
46 Me cava soti na kena dede, Jiova? Mo Ni vunitaki Kemuni tiko me sega ni mudu? Me kama tiko li, vakabukawaqa na Nomuni cudru?
47 O Ni sa kila, sa lekaleka na noqu bula, sa ka wale beka na nodra bula na luve ni tamata?
48 Na tamata cava e rawa ni bula me sega ni raica na mate? E rawa beka vua me drotaka na kaukauwa ni bulubulu? Sela.
49 I Jiova, sa E vei na Nomuni yalovinaka sa dau tu e liu? O koya o Ni yalataka vei Tevita ena Nomuni yalodina?
50 Mo Ni nanuma Jiova, na nodra sa beitaki vakaca na Nomuni tamata O ena noqu vosota na kena mosi na nodra veivakacacani o ira na tamata kece oqo,
51 O koya era sa veibeitaki vakaca tiko kina na kemuni meca, i Jiova, ka ra sa vakacacana na kalawa ni nomuni lumuti e duabau ga.
52 Me vakacaucautaki na Turaga o Jiova me sega ni mudu! Emeni. Emeni.