Chapter 22

Noqu Kalou, noqu Kalou, o ni sa biuti au ena vuku ni cava? Na cava sa rui yawa kina vei au na Nomuni veivuke?
2 Noqu Kalou, au sa tagi ena siga kei na bogi talega, o Ni galu ga ka sega ni rogoca na noqu vosa kei na noqu vutugu.
3 Ia, o Ni sa ka Tabu, o Ni sa tiko ena nodra veivakalavelaveti na Isireli.
4 Era sa vakararavi vei Kemuni o ira na tamai keimami, Era sa vakararavi, ia o Ni sa vakabulai ira.
5 Era tagi vei Kemuni, ka, ra sa vakabulai; era sa vakararavi vei Kemuni, ka, era sa sega ni madua.
6 Io, oi au na bacaniqele, au sega ni tamata, era sa beci au na tamata ka vakasewasewani au.
7 E ra sa vakalialiai au ka dredrevaki au; era sa vakaveve gusu vei au ka kuretaka na uludra ka tukuna,
8 Sa vakararavi o koya vua na Kalou, "Me vakabulai koya sara mada: me sereki koya mada, ni sa dau rekitaka na Kalou o koya!"
9 Ia, oi Kemuni na Kalou sa kauti au mai na kete, o Ni sa solia vei au nai nuinui, ni'u se sucu tiko vei tinaqu.
10 Au sa soli vei Kemuni ni'u se qai sucu. O Ni sa noqu Kalou mai na kete i tinaqu.
11 Mo ni voleka mai, ni sa kabiti au mai na leqa, sa sega e dua sa tu me veivuke.
12 Sa levu na bulumakau tagane sa wavokiti au; na bulumakau tagane mai Pasani era sa vakavoliti au.
13 E ra sa dalaga me vaka na laioni sa tagi ni via kana se via vala.
14 Au sa ceburaki yani me vaka na wai, sa veisivi kece na i sema ni noqu sui; sa waicala e lomaqu na yaloqu.
15 Sa mamaca mai na noqu i cegu me vaka na qele sa kavuru mai, sa kabi na yamequ ena ruku ni gadroqu, o Ni sa kauti au ki na kuvu ni soso ni mate.
16 Era sa voliti au na koli; na nodra i soqosoqo na tamata ca sa raviti au, era sa sualaka na ligaqu kei na yavaqu.
17 Au sa rawa ni wilika kece na suiqu. Era sa rai ka wadravi au matua.
18 Era sa wasewasea, na noqu i ubi, ka ra sa vakawirimadigitaka na noqu i sulu.
19 Ia, oi kemuni Jiova, mo Ni kakua ni vakayawayawa mai vei au; na noqu kaukauwa, mo Ni totolo mai mo Ni vukei au!
20 Me'u vakabulai mai nai seleiwau, me'u vakabulai mai vei ira na koli.
21 Me'u vakabulai mai na gusu ni laioni, me'u vakabulai mai na leu ni bulumakau kila.
22 Au na cavuta na yacamuni vei ira na taciqu, ena kedra maliwa nai soqosoqo levu, au sa laveti Kemuni.
23 Oi kemudou sa rerevaka na Kalou dou laveti Koya, oi kemudou na kawa i Tevita dou vakalagilagi Koya ka rerevaki Koya!
24 Sa sega ni besetaki kemudou se cati kemudou o Koya ena vuku ni veivakararawataki levu, se sa vunitaka na Matana mai vei kemudou; ia sa daurogoci kemudou ga ni dou sa dau kacivi Koya.
25 Na noqu vakavinavinaka sa tu ga vei Kemuni ena kedra maliwa nai soqosoqo levu. Au na vakacabora na noqu yalayala: ena matadra sa rerevaki Kemuni.
26 E ra sa kana na dravudravua ka mamau; o ira sa vakasaqara na Kalou, e ra na laveti Koya. Me bula ka sega ni mudu na yalomu!
27 Na i yalayala kei vuravura e dodonu me ra vakanananu, ka gole tale vua na Kalou. Na matavuvale kece e vuravura me ra cuva e Matamuni.
28 Sa nei Jiova na matanitu, ka sa vaka tulewa e vuravura taucoko.
29 O ira sa vuavuai e vuravura, era sa kana ka qarava na Kalou; o ira na kuvu ni soso era sa cuva e Matana kei ira talega era sa sega ni maroroi ira.
30 O ira nai tabatamata vou era sa qaravi koya, era na wili vua na Kalou me yacova nai tabatamata ka dua,
31 Era na lako mai ka tukuna na Nona dodonu, kei na dua tale nai taba se qai sucu, ni sai koya sa vakayacora na ka oqo.