Same

Chapter 27

O Jiova na noqu rarama kei na noqu bula talega; o, cei me'u rerevaka? O Jiova sa kaukauwa ni noqu bula; o cei me'u taqayataka?
2 Ni ra sa lako mai na tamata ca me veivala kei au, me ra kani au, o ira na kequ meca, era na tacaqe ka davo.
3 Kevaka sa tuva i valu vei au e dua na mataivalu, na yaloqu ena sega, ni rere; kevaka sa ia mai na kaba vakaivalu me'u valuti kina, E na ka ga oqo au sa na nuidei kina.
4 E dua ga na ka au sa gadreva vakalevu, o koya au na vakasaqara; me'u tiko ga ena Vale i Jiova, ena veisiga au sa bula kina, me'u vakasarava na Nona i ukuuku, ka me'u vakatataro tiko e na Nona Vale Tabu.
5 E na gauna dredre, o Jiova ena vunitaki au ena Nona vale cecere; ena tikina vuni ni Nona vale, ena vunitaki au; ka vakatikori au ena uluvatu.
6 Ia oqo sa laveti cake na uluqu me cecere cake vei ira na kequ meca era vakavolivoliti au; o koya au na vakacabora kina nai soro ni reki ena Nona Vale Tabu; Au na sere, io, au na seretaka na vakavinavinaka kivei Jiova.
7 Mo Ni rogoca, Jiova, na tagi ni domoqu! Mo Ni lomani au mai, Ni rogoci au mai.
8 O Ni sa tukuna, "Vakasaqara mai na Mataqu," sa tukuna yani na yaloqu, "Na Matamuni au na vakasaqara."
9 Mo ni kakua ni vunitaki kemuni mai vei au; Mo Ni kua ni vuki tani ena cudru; o Ni sa dau vukei au tiko; mo Ni ka kua ni biuti au se laivi au' Na Kalou ni noqu vakabulai.
10 Ni rau sa biuti au na tamaqu kei na tinaqu, o Jiova sa qai keveti au.
11 Jiova, ni vakavulica vei au na Nomuni sala, mo Ni tuberi au ena sala vinaka, ena vukudra ga na kequ meca.
12 Ni kakua ni soli au ki na nodra veitalia na meca; ni sa tubu cake tikoga na veibeitaki vakailasu me baleti au. Ia sa vaka ni sa uvucaki mai nai valavala kaukauwa.
13 E rawa ni yali vakadua na yaloqu, kevaka me'u a sega ni yalovinaka vei Jiova e na nodra vanua na bula.
14 Waraki Jiova ga mo tamata qaqa, e na qai vakaukauwataka na yalomu, mo wawa, au sa tukuna!