Same

Chapter 18

Au na lomani Kemuni, Jiova, na Noqu kaukauwa.
2 O Jiova na Noqu vatudei, na Noqu i drodro, na Noqu dauniveisereki, na Noqu Kalou, Noqu kaukauwa, sasabai, na davui ni noqu vakabulai, na Noqu bai kaukauwa.
3 Au na kacivi Jiova, o Koya e dodonu me vakacaucautaki; au sa vakabulai, mai vei ira na kequ meca.
4 Na gaga ni mate sa siviti au, sa vakarerei au, ni sa luvu mai na vakavuravura.
5 Na rarawa kei Bulu sa vakavoliti au; na i cori ni mate sa bolei au.
6 Ni'u sa vakayavalati, au sa qai kacivi Jiova, au sa kaci cake vua na Kalou; sa qai rogoci au mai na Nona vale Tabu, sa lako mai matana na noqu tagi, io, ki nadaligana.
7 Sa qai uneune o vuravura, ka yavavala na yavu ni veidelana, ni sa cudru mai o Koya.
8 Sa kubou mai na ucuna, sa bukawaqa mai na gusuna, sa caudre kina na koala.
9 Sa lobika talega na lomalagi ka siro sobu mai ni sa tu, na butobuto sa tu ena ruku ni yavana.
10 Sa vodo ena Jerupi, ka vuka, sa vuka yani ena ruku ni yavana.
11 Sa cakava o Koya na butobuto me Nona tikina vuni; na Nona i ubi na wai butobuto kei na o vavaku ni lomalagi.
12 Mai na rarama sa tu e Matana, era sa takoso mai na Nona o vavaku kei na uca cevata kei na koala sa caudre tu.
13 O Jiova sa kurukuru mai lomalagi, sa rorogo mai na domo i Koya sa cecere sara, na uca cevata kei na koala sa caudre tu.
14 Sa tala yani na Nona gasau, ka vakasavi ira na meca. Sa levu mai na livaliva, sa qai vakayalia tale yani.
15 Era sa basika mai nai davodavo ni wai ka ra laukune, na yavu kei vuravura sa vakaraitaki, e na Nomuni veivunauci Jiova, ena rorogo ni i cegu ni ucumuni.
16 Sa talai mai cake, sa kauti au, sa kauti au tani mai na wai e vuqa.
17 Sa vakabulai au mai vei ira na kequ meca kaukauwa, mai vei ira era cati au, ni ra sa kaukauwa cake vei au.
18 Era sa vakaogai au ena siga ni noqu rarawa. Ia, o Jiova sa noqu i tokani.
19 Sa kauti au mai ki na vanua rabailevu; sa vakabulai au ni sa rui taleitaki au.
20 Sa saumi au o Jiova me vaka na noqu yalododonu, me vaka na savasava ni ligaqu, sa savai au kina o Koya.
21 Ni'u maroroya na sala i Jiova, ka sega ni lako tani vakaca mai vua na noqu Kalou.
22 Na nona lewa kecega sa tu e mataqu, na Nona i lesilesi kecega au sa sega ni biuta tani.
23 Sa sega na ka me'u beitaki kina mai Vua, au sa maroroi au mai na ca.
24 O koya oqo sa saumi au kina o Jiova, me vaka na savasava ni ligaqu e matana.
25 Vei ira na dauyalololoma, o ni na vakaraitaka na Nomuni yalololoma; vei ira na sega cala, o na vakaraitaka na Nomuni sega ni cala;
26 Vei ira na yalosavasava, o na vakaraitaka na Nomuni yalosavasava; vei ira na lawaki ca o ni na vakaraitaka na Nomuni Yalomatua.
27 O ni na vakabulai ira na yalomalumalumu, ka na vakarusa na viavia levu.
28 O ni na vakawaqaca na noqu cina, na Kalou o Jiova ena vakararamataka na noqu butobuto.
29 Ena Vukumuni, au na bolea kina na mataivalu, ena vuku ni noqu Kalou, au na ladeva kina na bai ni valu.
30 Ni sa Kalou ga o Jiova, sa taucoko ga na nona sala: na vosa i Jiova sa vakadinadinataki; o koya nai sasabai vei ira sa vakararavi vua.
31 O cei sa Kalou" O Jiova duadua ga? O cei tale na Vatu Dina, o Jiova duadua ga?
32 Na Kalou ga sa vakayaragitaki au ena kaukauwa, ka sa cakava me taucoko na noqu i lakolako.
33 Sa cakava na yavaqu me vaka na yava ni me kila, ka sa vakatikori au ena vanua cecere.
34 Sa vakavulica na ligaqu me vala, na ligaqu sa rawa ni loveca na dakai titi varasa.
35 O ni sa solia talega vei au na i sasabai ni Nomuni veivakabulai; sa laveti au cake na Ligamuni i matau, na Nomuni yalovinaka sa vakaceceretaki au.
36 O ni sa vakarabailevutaka na noqu sala e mataqu, au na sega ni tidara kina.
37 Au sa cici ka sivi ira na kequ meca, au sa vakarusai ira kece, ka'u sa qai lesu tale.
38 Au sa vakamavoataki ira, me ra sa sega ni tucake rawa; era sa davo kecega e na ruku ni yavaqu.
39 Sai kemuni ga sa vakakaukauwataki au e nai valu; o ni sa vakamalumalutaki ira, sa tu, me veivorati kei au.
40 O ni sa solia talega vei au na domodra na kequ meca, au sa vakarusai ira sa cati au.
41 Era sa kaci vakadomolevu, sa sega e dua me na vukei ira, na Kalou mada ga sa sega ni via rogoci ira.
42 Au sa vakadrukai ira, me vaka na kuvu ni soso e na cagi; au sa viviraki ira me vaka na duka ena sala.
43 O Ni sa vakabulai au mai na nodra veiqati na tamata, o ni sa cakava me'u ulu ni veimatanitu, era sa qaravi au o ira au sega ni kilai ira.
44 Era sa talairawarawa ga ni ra sa rogoci au; era sa cuva ga vei au na kai tani.
45 Era sa dro talega na kai tani, ka yali yani, Era sa rere vakalevu, ka dro mai na nodra i vunivuni.
46 Sa bula o Jiova! Me vakacaucautaki na noda Vatudei! Na Kalou, na noqu i Vakabula, me vakacerecerei.
47 Na Kalou ga sa vala ena vukuqu, ka vakamalumalutaka na tamata e yavaqu;
48 Sa vakabulai au mai vei ira na kequ meca, o Ni sa laveti au cake, mai vei ira sa tu me tuva i valu vei au; o Ni sa vakabulai au mai vei ira na dauveivakasaurarataki.
49 O koya oqo, au na vakavinavinaka tikoga kina vei Kemuni, Jiova, ena kedra maliwa na sega ni cili. Au na vakacerecerea na yacamuni.
50 Sa solia na veivakabulai levu vei koya na nona tui, sa cakava na loloma levu vei koya sa lumuta o Koya, Io, vei Tevita kei ira kece na nona kawa.