Same

Chapter 56

Na kalou, me levu mai na Nomuni yalololoma vei au, ni ra sa via tilomi au na tamata; e na siga taucoko sa vala tiko mai ka vakasaurarataki au.
2 Ena siga taucoko era sa vakasasataki au na kequ meca, sa lewe levu sa veivala kei au, oi Kemuni sa cecere sara.
3 Au sa vakararavi vei Kemuni ena gauna kece e tarai au kina na rere.
4 Ki vua ga na Kalou, au sa biuta kina na noqu vakararavi, au na sega ni rere. Na cava ena rawa ni cakava vei au na tamata?
5 Ena siga taucoko, era sa moica na noqu vosa, Era sa vakananuma na ca baleti au.
6 Era sa vakasoqoni ira, era sa vuni, era sa vaka raica na noqu I kalawa kece, ni ra sa no ka waraki au tiko.
7 Era na dro bula beka ena vuku ni ka ca era bukia? Na Kalou, ena Nomuni cudru, me ra vakabalei na tamata oqo!
8 O ni sa wilika na noqu lako voli; Na wai ni mataqu kece, o ni sa vakasoqona ena Nomuni tavaya; E ra sa tiko beka ena Nomuni i vola?
9 Ni'u sa tagi vei kemuni, era na lesu tale na kequ meca; Oqo, au sa kila kina, ni sa tovaki au na Kalou.
10 Ki vua na Kalou, (Au na vakacerecerea na Nona vosa), ki vei Jiova, (Au na vakacerecerea na Nona vosa),
11 Ki vua na Kalou, au sa biuta kina na noqu vakararavi, au na sega ni rere, na cava ena cakava rawa vei au na tamata?
12 Na yalayala sa caka vei Kemuni sa vesuki au talega, na noqu Kalou; Au na vakacabora na veivakacerecerei vei Kemuni,
13 O Ni sa vakabula na yaloqu, mai na mate. O Ni sa sega beka ni tarova na yavaqu me'u kua ni tacaqe, me'u lako voli kina ena mata ni noqu Kalou ena rarama ni bula?