Same

Chapter 33

Dou rekitaki Jiova oi kemudou na yalododonu! Sa rui totoka na vakavinavinaka mai vua na yalododonu.
2 Dou vakavinavinaka vei Jiova ena api, dou cakava na rorogo vei Koya ena i yaya ni vakatagi e tini na kena wa.
3 Dou seretaka Vua na sere vou; qiria vakamatau na rorogo ni reki.
4 Baleta na vosa i Jiova sa dodonu, na Nona cakacaka kecega sa caka ena dina.
5 O Jiova sa lomana na dodonu kei na lewa; sa sinai o vuravura ena yalovinaka i Jiova.
6 E na vosa i Jiova sa buli kina o lomalagi, kei ira kece ga sa tiko kina e nai cegu ni gusuna.
7 Sa kumuna kecega na wai ni waitui me vaka na i kovukovu; sa biuta na titobu ena vale ni maroroi.
8 Me rerevaki Jiova o vuravura kecega; me ra vakaqoroqoroi koya o vuravura taucoko.
9 Baleta ni sa vosa o Koya sa yaco na ka kecega, sa vakarota o Koya sa tu na ka kecega.
10 O Jiova sa vakatawayagataka na nodra i vakasala na veimatanitu; sa sega ni yaco na nodra i tuvatuva na tamata.
11 Nai vakasala i Jiova sa tudei ka sega ni mudu, nai tuvatuva ni Yalona, ki nai tabatamata kecega.
12 Sa kalouvinaka na matanitu sa nodra Kalou o Jiova, kei ira sa digitaki Koya me nona i votavota.
13 Sa rai mai lomalagi o Jiova ka raici ira na luve ni tamata.
14 Mai na Nona i tikotiko, sa vakaraici ira kece na lewe i vuravura;
15 Sa bulia vakamatua na yalodra yadudua, sa vakaraica vinaka na nodra cakacaka.
16 Sa sega ni bula na tui ena levu ni nona mataivalu; se na tamata qaqa mai na nona kaukauwa.
17 Sa ka wale na vakanuinui ki na ose me ra bula kina; se ki na kena kaukauwa me veivakabulai.
18 Raica, na mata i Jiova sa tiko ga vei ira sa rerevaki Koya, vei ira sa vakanuinui tiko ki na Nona yalololoma,
19 Me vakabulai na yalodra mai na mate, ka vakabulai ira tiko mai na dausiga.
20 Sa waraki Jiova tiko na yaloi keimami; o Koya na neimami i vukevuke kei na neimami i sasabai.
21 Na yaloi keimami ena marautaki Jiova ni keimami sa vakararavi ki na Yacana Tabu.
22 I Jiova na Nomuni yalololoma me sa tiko ga kei keimami me vaka ni keimami vakanuinui tiko vei Kemuni.