Same

Chapter 19

Na lomalagi sa tukuna na lagilagi ni Kalou; Na maliwa lala sa vakaraitaka na cakacaka ni Kalou.
2 Na veisiga yadudua sa vosa tiko, na veibogi sa vakaraitaka na kila ka.
3 Sa sega ni dua e vosa, se, na domo e rorogo.
4 Na nodra i vakarau ga, sa lako yani ki vuravura taucoko, kei na nodra vosa ki nai yalayala kei vuravura. Sa cakava na ka buli oqo, me valenisoro ni matanisiga,
5 Sa vaka na Tagane sa qai vakawati ni sa lako mai na nona loqi, ka sa reki me vaka na qaqa ni sa ciciva na cere.
6 Sa vakatekivu na kena cadra mai na dua na yasa ni lomalagi, ia sa la'ki dromu sobu ki na yasana e dua tani; sa sega na ka e vuni rawa mai na kena katakata.
7 Na i vakaro i Jiova sa dodonu sara, sa saumaka na yalo ni tamata me vinaka; nai tukutuku i Jiova sa tudei, sa veivakavukui;
8 Na i lesilesi i Jiova, sa dina, sa vakarekitaka na yalo.
9 Na rerevaki Jiova, sa savasava, sa tudei ka sega ni mudu; na lewa i Jiova, sa dina ka savasava taucoko.
10 Me gadrevi vakalevu cake na vosa ni Kalou, mai na koula, io, na koula vinaka sara, sa kamikamica cake sara mai na oni, io mai na i soso oni.
11 Ena ka oqo, sa vakasalataki kina na Nomuni tamata, ia ni sa maroroya ena sautu kina.
12 O cei ena kila rawa na nona cala? Mo ni vakasavasavataki au mai nai valavala ca kecega au vunitaka tu.
13 Na nomuni tamata mai na garova nai valavala ca; ka me ra kakua vakatulewa vei au. Ia au sa na qai sega ni beitaki rawa, au sa na galala mai nai valavala ca kecega.
14 Mo Ni vakatara na vosa ni gusuqu kei na vakanananu ni yaloqu, me ciqomi e Matamuni, I Jiova, na noqu Kaukauwa, na noqui Vakabula.