Same

Chapter 84

Sa rui taleitaki vakaidina na Nomuni vale, i Jiova ni lewe vuqa!
2 Sa taleitaka na yaloqu, ia sa guta vakalevu na lomaqu na via tiko ena Nomuni loma ni bai, Jiova; na uto ni yaloqu kei na lewequ sa tagica na Kalou Bula.
3 Na Separo mada ga, sa kunea na nona vale, na kakabace, sa kunea nai su me vakalutu yaloka kina ka diridiri kinaOsa vakakina na yaloqu ena Nomuni cabocabo ni soro, Jiova ni lewe vuqa, na noqu Tui, na noqu Kalou.
4 Sa kalouvinaka o ira sa tiko ena Nomuni vale; era na vakacaucautaki Kemuni tikoga “ Sela.
5 Sa kalouvinaka na tamata sa tiko vei Kemuni na nona kaukauwa. Na yalona sa lakova nai lakolako vaKalou.
6 Ni ra sa lako curuma na Buca ni Wai ni Mata ka cakava na mataniwai; na uca sa vakasinaita ena wai.
7 Era na lako mai na kaukauwa ki na kaukauwa e levu sara; ni ra sa basika tiko ena matai Koya na Kalou e Saioni.
8 I Jiova, na Kalou ni lewe vuqa, mo Ni rogoca na noqu masu; mo Ni vakatudaliga mai, na Kalou i Jekope! Sela.
9 Io, Na Kalou, na noda i sasabai, mo Ni raica mada na matai koya na Nomuni lumuti.
10 E dua na siga ena na Nomuni loma ni bai sa uasivia na siga e udolu. E vinaka cake vei au me'u i vakatawa ni vale ni Kalou mai na tiko ena nodra vale na tamata ca.
11 Na Kalou o Jiova, na matanisiga kai sasabai; O Jiova ena solia nai tovo rairai vinaka kei nai ukuuku; ena sega ni bureitaka e dua na ka vinaka vei ira sa lako vakadodonu e matana.
12 I Jiova ni lewe vuqa; sa kalouvinaka na tamata sa vakadinati Kemuni!