Niemaia

Chapter 8

Oqo era sa soqoni vata kece mai na tamata me vaka ga e dua na tamata e na mata ni Matamata ni Wai; era sa tukuna vei Esera na vunivola me kauta mai nai Vola ni Vunau i Mosese sa solia o Jiova me ra vakaroti kina na Isireli.
2 O Esera na bete sa kauta mai nai vunau ena matadra nai soqosoqo levu, na tagane kei na yalewa kei ira kecega sa rawa ni vakarorogo vinaka me kila, e na i matai ni siga ni kavitu ni vula.
3 Sa wilika o koya e na vanua era sa soqoni kina mai na Matamata ni Wai, tekivu ena mataka me yacova na sigalevu tutu, ena matadra na tagane kei na yalewa kei ira era sa dauvakarorogo me ra kila vinaka. Na nodra vakarorogo kece sa vakanamata ga ki nai vola ni vunau.
4 O Esera na vunivola sa tucake tu ena i tutu vakarautaki ena kau, sa caka oqo me baleta ga na soqoni oqo. Ena yasai Esera, e nai matau, sa tucake tu kina o Matatitaia, o Sema, o Anaia, o Uraia, o Ilikaia, kei Maesaia; e nai mawi o Pedaia, o Misaeli, o Malakija, o Asumi, o Asabadana o Sakaraia kei Mesulame.
5 Sa dolava o Esera nai vola e matadra kecega na tamata, ni sa cecere na vatavata sa tucake tu kina o koya, ni sa cega nai vola o koya, era sa tucake kece o ira na tamata.
6 Sa vakacaucautaki Jiova na Kalou levu o Esera. Era sa tukuna kecega na tamata ka sauma lesu, "Emeni, Emeni!" ni ra sa laveta cake tu na ligadra ka vakacuva na uludra ka lotu vei Jiova, na matadra sa tara sara tu ga na qele.
7 O Josua, o Bani, o Serebaia, o Jamini, o Akubu, o Sabatai, o Odaiya, o Maseia, o Kelita, o Asaraia, o Josabeti, o Anani, o Pilaia, kei ira na Livai, era sa vukei ira na tamata ena nodra kila vinaka na vosa ni vunau; ni ra sa dui tucake tu ena nodra dui tikina.
8 Era sa wilika tale vakavinaka, ka vakamacalataka na kena i balebale me vaka na vosa ni vunau ni Kalou, me kilai vakavinaka na ka sa wiliki tiko.
9 O Niemaia na Kovana, o Esera na bete kei na vunivola ni vunau i Jiova, kei ira na Livai era sa vakavulici ira tiko na tamata, era sa tukuna mai, "Na siga oqo sa tabu me nei Jiova na noda Kalou, me kua na tagi se rarawa," ni ra sa tagi kecega na tamata ni ra sa rogoca na vosa ni vunau.
10 Sa qai vosa vei ira na tamata, "Mo ni lako ka kania na kena uro ka gunuva na kena kamikamica, ka vakauta nai votavota vei ira sa sega ni votai vei ira; ni sa tabu na siga oqo me nei Jiova, me kua ni dua e rarawa baleta na marautaki ni Turaga o Jiova sa vu ni noda kaukauwa."
11 Era sa tucake na Livai ka vakatabataba yani ka tukuna vei ira na tamata, "Mo ni tiko lo, ni sa tabu na siga oqo; me kua ni dua e rarawa."
12 Era sa lako na tamata ka kana, ka gunu, ka veivotai, ka reki vakalevu, ni ra sa qai kila na vosa kecega sa vakamacalataki vei ira.
13 E nai ka rua ni siga, o ira nai liuliu mai na yavusa vuvale kece ni tamata, o ira na bete kei na livai, era sa soqoni yani vei Esera na vunivola, me rawa ni ra kila vakavinaka sara na vosa ni vunau.
14 Era sa kunea ni sa volai tu e nai vunau me vaka nai vakaro nei Jiova vei Mosese, ni dodonu me ra tiko na gone ni Isireli ena vei vale lalai ena gauna ni solevu ni kavitu ni vula,
15 Sa dodonu me vakarogoi ka kacivaki yani ena veikoro kece kei Jerusalemi talega, "Me ra lako yani ki na ulunivanua ka kauta sobu mai na taba ni olive, na taba ni kau waiwai, na taba ni mateli, na taba ni balabala, kei na taba ni kau drauilevu, me mai tara kina na vale lailai me vaka sa volai."
16 Era sa lako na tamata ka kauta sobu mai na tabanikau ka tara na vale lalai ena dela ni nodra vale, se ena buturara ni loma ni bai ni vale ni Kalou ena loma ni bai levu talega mai na Matamata ni Wai, ena loma talega ni bai levu mai na matamata i Ifereimi.
17 O ira kece nai soqosoqo levu ka ra sa lesu mai na vakabobulataki, era sa tara na veivale lalai ka tiko kina; me tekivu sara mai na veisiga i Josua na luvei Nuni me yacova mai na siga oqo, sa sega ni daucaka tu e Isireli na ka oqo. O koya oqo sa yaco kina e dua na veimarautaki levu.
18 Ena veisiga yadudua talega, mai nai na matai ni siga ka yacova nai otioti ni siga, sa wilika tiko o Esera nai Vola ni Vunau ni Kalou. Era sa cakava tiko na solevu oqo me vitu na siga, sa dua sara nai soqosoqo tabu me vaka na kena i valavala sa volai.