Niemaia

Chapter 1

Na vosa nei Niemaia na luvei Akalaia. Ena vula o Kisilevi, e nai karuasagavulu ni yabaki, ena noqu tiko mai Susani na vanua cecere,
2 O Anani na taciqu, e a lako mai Juta, kei ira e so na turaga; au sa vakataroga me baleti ira na Iperiu era sa dro bula yani, era sa lako curuma yani na veivakabobulataki kei na veika me baleti Jerusalemi.
3 Era sa tukuna vei au, "O ira kece era sa dro mai na veivakabobulataki, e ra sa oca vakalevu ka yalolailai. Na bai kei Jerusalemi sa basuki kei na kena matamata sa kama talega."
4 Ni'u sa rogoca na veika oqo, au sa dabe ka tagi ka vakamamakeukeu, ka lolo, ka masu vakalevu vua na Kalou ni lomalagi me vica vata na siga.
5 Au masu vaka oqo: "I Jiova na Kalou ni lomalagi, na Kalou cecere ka vinaka, o Ni sa maroroya tikoga na Nomuni veiyalayalati kei na Nomuni yalololoma vei ira sa lomani Kemuni ka muria na Nomuni vakaro,
6 "Ni dolava tiko na Daligamuni kei na Matamuni me rai tiko mai, Mo ni rogoca kina na nona masu na Nomuni tamata o koya sa masu tiko yani oqo, ena siga kei na bogi me baleti ira na Isireli na Nomuni tamata, ka vakatusa tiko na nodra i valavala ca na Isireli o koya sa caka tiko vei Kemuni. Na vale nei tamaqu kei au keimami sai valavala ca vei Kemuni.
7 "Keimami sa cakacaka vakaca sara vei Kemuni, keimami sa sega ni maroroya na Nomuni vakaro, na Nomuni lesilesi se na lewa o ni sa vakarota vei Mosese.
8 "Moni nanuma, au kerea, na vosa o ni vakarota vua na Nomuni tamata o Mosese ka vaka: 'Kevaka o ni sa sega ni yalodina tiko, Au na vakatolosevi kemuni ena kedra maliwa na veimatanitu;
9 'Ia, kevaka o ni sa lesu mai vei Au, ka maroroya na Noqu i vakaro ka muria, e dina ga ni dou sa vakatolosevi vakayawa sara, Au na vakasoqoni ira mai kea, ka kauti ira lesu ki na vanua Au a digitaka me tiko kina na Yacaqu.'
10 "O ira oqo era sa Nomuni tamata ka Nomuni dauniveiqaravi, o ira o ni sa voli ira lesu ena Nomuni kaukauwa levu kei na Ligamuni qaqa.
11 "I Jiova au sa masu, me vakarorogo mada na Daligamuni ki na nona masu na Nomuni tamata, o koya sa gadreva tikoga me rerevaka na Yacamuni; ka me vuavuai vinaka, au sa masulaka tiko oqo, Mo ni solia talega vua na Nomuni yalololoma ena matadra na tamata." Ni sa dua ga na dau tutaki mena bilo na tui.