Niemaia

Chapter 2

Sa qai yaco oqo, ena vula o Nisani, e nai ka ruasagavulu ni yabaki nei Atekisekise na Tui, ni sa tu e matana na waini, au sa qai taura na bilo waini ka solia vua na tui. Oqo me'u tukuna mada, se sega vakadua, me'u rarawa ena mata ni tui.
2 Sa vosa mai na tui ka vaka: "Na cava o sa rui mata rarawa kina vakalevu, o a sega ni tauvimate? Oqo sa vakaraitaka ga na rarawa ni yalo." Sa tubu vei au e dua na rere levu,
3 Au tukuna vua na tui "Me bula na tui ka sega ni mudu! Me kua ni rarawa vakacava na mataqu, ni koro oqo, na vanua era sa davo tiko kina o ira na tamaqu, sa rusa koto, ka sa kama yavu na kena matamata."
4 Sa sauma mai na tui ka vaka, "Na cava o sa vinakata?" Au sa masu vua na Kalou ni lomalagi.
5 Au sa tukuna vua na tui, "Kevaka sa vinaka vei kemuni, kevaka sa kune loloma na nomuni tamata e matamuni, au sa kerea mo Ni talai au ki Juta, ki na koro era sa bulu tiko kina na tamai keimami, me'u tara cake tale."
6 Sa tukuna mai vei au na tui (ni dabe tiko na ranadi e yasana), "Ena vakacava na dede ni nomu lako? O na lesu tale mai ena gauna cava?" Sa vinaka vua na tui me talai au ka'u sa tuva vua na kena gauna.
7 Au sa tukuna talega vua na tui, "Kevaka sa vinaka vua na tui, me soli vei au nai vola ena vukudra na kovana, ena veivanua me sivia yani na Uciwai levu, me ra solia vei au na galala me'u lako sivia na vanua me yacova ni'u sa yaco ki Juta.
8 "Me dua talega nai vola vei Esava nai vakatawa ni nona veikau na tui, me solia na kau me caka kina na matamata ni vanua cecere sa gole ki na vale ni soro, me caka talega kina na bai ni koro, na vale talega au tiko kina." Sa vakadonuya vei au na tui, me vaka na liga ni Kalou sa tiko ga vei au.
9 Au sa lako vei ira na Kovana ena veivanua sivia na Uciwai levu, ka solia vei ira na nona i vola na tui. Na tui sa talai ira tiko mai na kavetani ni valu kei ira na mataivalu ose me ra sala vata tiko mai kei au.
10 O Senivalati na Oranaiti kei Topaia na Amonaiti na vakailesilesi ni tui, ni rau sa rogoca, e rau sa yavalati vakalevu, ni sa lako mai e dua me raica na nodra tiko vinaka na luvei Isireli.
11 Au sa lako mai ki Jerusalemi ka tiko kina me tolu na siga.
12 Au sa duri cake ena bogi oi au kei na so tale na turaga, au sega ni via tukuna vua e dua na cava sa biuta tiko e lomaqu na Kalou me caka e Jerusalemi. Sa sega talega na manumanu sa tu vata kei au, vakavo ga na ose au dau vodoka tiko.
13 Au sa curu ki tuba ena bogi mai na Matamata ena Buca me donuya na Keli ni Wai ni Gata kei na Matamata ni Benu, ka vakaraica na bai ni koro kei Jerusalemi o koya sa kabasu tu, ka sa kama tale tu ga na kena matamata.
14 Au sa lako sara ki na Matamata ni Tobu ni wai kei na Tobu ni Wai levu ni Tui, sa sega ni dua na tikina me nona na ose au sa vodoka tiko.
15 Au sa lako yani ena bogi mai na buca ka vakaraica na bai ni koro, ka'u sa lesu tale me'u la'ki curu mai ena Matamata mai na Buca, ka'u sa lesu tale.
16 Era sa sega ni kila na vakai lesilesi, se'u sa lako kivei, se, na cava au sa cakava tiko: au se bera tiko ni tukuna vei ira na Isireli, vei ira na bete, vei ira na turaga, vei ira na vakailesilesi, kei ira na kena vo o ira era a cakava na cakacaka.
17 Au sa qai tukuna vei ira, "O ni sa raica na vakaloloma eda sa tiko kina, sa ca vakalevu sara nai tuvaki kei Jerusalemi, sa kama tu na matamata, mo ni lako mai me da tarai Jerusalemi cake tale, me sa mudu mada na noda vakalolomataki tiko."
18 Au sa tukuna vei ira na liga ni Kalou sa rui vinaka vei au kei na nona vosa na tui, sa vosa kina vei au. Era sa tukuna kecega-"Meda tucake ka tara tale na bai." Era sa dodoka yani na ligadra ka tekivuna na cakacaka vinaka oqo.
19 O Senivalati na Oranaiti, o Topaia na Amonaiti kei Kesemi na Arapea, ni ratou sa rogoca na ka oqo, e ratou sa dredre ka veivakalialiai ka beci keimami sara ka tukuna, "Na cava oqo o ni sa cakava tiko? E dodonu li mo ni veicoqacoqa kei na tui?"
20 Au sa sauma vei iratou ka tukuna, "Na Kalou ni lomalagi vakataki Koya ena tokona ka vakataucokotaki keimami. O koya oqo era na tucake kina na Nona tamata ka tara na bai, sa sega na nomuni votavota, se na dodonu, se na i vakananumi e Jerusalemi. "