Niemaia

Chapter 6

Sa qai yaco ni ratou sa rogoca o Senivalati, o Topaia kei Kesemi na Arapea kei ira kece na meca, ni sa tarai cake tale na bai-lalaga ka sa sega na ka e vakataotaka, (oqo na gauna e se bera ni vakakatubataki kina na matamata)
2 e rau sa talatala mai vei au o Senivalati kei Kesemi ka vaka, 'lako mada mai me datou mai sota mada ena dua na koro lailai ena buca o Ono.' E rau sa nanuma tiko mai me rau mai vakaleqai au.
3 Au sa sauma nai tukutuku ka vaka, 'sa dua na cakacaka levu au sa cakava tiko oqo, au na sega ni lako sobu yani. Na cava me tu vakadua kina na cakacaka ka me'u lako mada yani vei kemudrau?'
4 E rau sa vakauta mai vakava nai tukutuku ka sa saumi lesu talega vakakina.
5 Sa vakatala tale mai o Senivalati na nona i talai e na kena i kalima ni gauna ena dua nai vola dolavi sa taura tiko e ligana.
6 Sa vakaoqo na ka sa volai kina: Sa yaco mai nai tukutuku mai na veivanua kecega, sa tukuna kina o Kesemi ni o iko kei ira kecega na Iperiu sa nakita tiko me vakabebe, nai tukutuku talega oqo, sa tukuna tiko ni o ni sa tara tiko na bai-lalaga oqo kei Jerusalemi, mo kena tui kina o iko.
7 O iko talega sa lesia eso na parofita me ra sa kacivaka tiko nai tukutuku e Jerusalemi me baleti iko. Era sa kacivaka tiko, "Sa tiko e dua na tui e Juta!" Nai tukutuku oqo sa na vakau cake vua na tui. Lako mai, me daru mai veitalanoa mada ena vuku ni ka oqo.
8 Au sa sauma vua ka vaka, "Sa sega na ka, me vaka o sa vola tiko mai sa caka tiko eke, oqori o sa bulia tikoga e lomamu."
9 Era sa saga tikoga me ra vakarerei keimami, era sa tukuna tiko "Sa malumalumu na ligadra ni ra sa cakacaka tiko, ena sega ni rawa ni caka." o koya oqo, oi kemuni na Kalou, mo ni vakaukauwataka na ligaqu.
10 Sa oti oqo, au sa lako sobu mai ki na vale nei Semaia na luvei Delaia na luvei Maetabili, e dua sa dau solia nai tukutuku vuni; a sa tukuna mai, "me daru la' ki sota mada ena vale ni Kalou, ena loma ni vale ni soro, me daru sogota na katuba ni vale ni soro, ni ra sa lako tiko mai me vakamatei iko; io sa dina, ena bogi era na lako mai me vakamatei iko."
11 Au sa vosa ka vaka: 'Me dua na tamata vakataki au me dro?' O cei sa tiko mai keri me vakataki au, me lako ki na vale ni soro me vakabulai koya kina? Au na sega ni lako yani ki loma!'
12 Au sa kila ni sa sega ni talai koya mai na Kalou, sa tukuna ga o koya na veika oqo baleta ni rau sa saumi koya mai o Topaia kei Senivalati.
13 Sa saumi o koya oqo, me vakarerei au ka muria na sala cala ka me'u valavala ca kina, me rawa ni dua kina na nodra i tukutuku ca, me rawa ni'u vakalialiai kina.
14 Na noqu Kalou, mo Ni nanumi Topaia kei Senivalati, me vaka na nodrau i valavala kei na parofita yalewa o Noadia kei ira kece na vo ni parofita o ira era via vakarerei au.
15 Sa vakaoti na tara ni bai-lalaga oqo, ena i ka ruasagavulu ka lima ni siga ni vula o Elulu, ena limasagavulu karua na siga.
16 Sa yaco mera rogoca kece, kei ira kece na matanitu voliti keimami era sa keimami meca, sa raica na veika kece oqo, era sa taqaya ka yalolailai, ni ra sa kila na cakacaka oqo sa sega tale e dua, na liga duadua ga ni Kalou sa cakava oqo.
17 Ena siga o ya o ira na turaga e Juta, era sa volavola vei Topaia, sa lako talega mai vei ira nai vola nei Topaia.
18 Sa levu vei ira e Juta sa yalayala tu vei Topaia, baleta ni sa vugoi Sekonaia na luvei Arapa kei na luvei Jecanana sa vakawatitaka na luvei Mesulame na luvei Berekaia.
19 Era sa vakamacalataka na nona cakacaka vinaka me'u kila, ka tukuna talega na noqu vosa vua. Sa vakauta ga mai o Topaia nai vola vei au me vakarerei au kina.