1 Veigauna

Chapter 29

Sa tukuna talega o Tevita na tui kivei ira nai soqosoqo taucoko: "Na luvequ o Solomoni, o koya taudua ga sa digitaki koya na Kalou, e se gone ga ka lecaika; ia na cakacaka oqo sa rui ka vakaitamera, baleta na vale oqo e sega ni nona na tamata ia sa nei Jiova ga na Kalou.
2 "Ia oqo na vale ni noqu Kalou au a vakarautaka e na noqui gu taucoko: na koula me baleta nai yaya e caka ena koula, siliva me baleta nai yaya siliva, varasa me baleta nai yaya varasa, kaukamea me baleta nai yaya kaukamea, kau me baleta nai yaya kau, na vatu onikisa, na vatu me vonoti, vatu tatalivaliva ena kena duiroka, na veimataqali vatu talei, kei na vatu mavolo e ka levu sara.
3 "O koya oqo, ni'u a gadreva dina e yaloqu na vale ni noqu Kalou, au sa solia kina ki na vale ni noqu Kalou e levu ka sivia na ka au vakarautaka me tara kina na vale tabu, na noqu koula kei na siliva vakamareqeti:
4 "E tolu na udolu na taledi na koula, [dua na drau ka mani tinikarua na tani] na koula mai Ofira, kei na vitu na udolu na taledi na siliva sa vakatovolei [rua na darau onosagavulu na tani], me botani kina na lalaga ni veivale;
5 "Na koula me baleta nai yaya koula kei na siliva cakava na ligadra na matai. Ia o cei mada ena yalo me baleta nai yaya siliva, kei na cakacaka kecega e rawarawa me vakacabori koya ena siga oqo vei Jiova?"
6 Era sa qai yalo rawarawa mera vakacabori ira nai liuliu ni vei vuvale i tamadra, liuliu ni vei yavusa e Isireli, kavetani ni lewe udolu kei na veiyadrau, vata kei ira sa lewa na nona cakacaka na tui.
7 Era sa solia ki na cakacaka ni vale ni Kalou e lima na udolu na taledi [dua na drau walusagavulu ka vitu na tani] kei na tini na udolu na darika na koula, e tini na udolu na taledi [tolu na drau vitusagavulu ka lima na tani] na siliva, e tinikawalu na udolu na taledi [ono na drau vitusagavulu ka lima na tani] na varasa, kei na dua na drau na udolu na taledi [tolu na udolu vitu na drau limasagavulu na tani] na kaukamea.
8 Ia o koya ga sa tu vua na vatu talei sa solia ki na vale ni yau ni vale i Jiova, ki na ligai Jeieli na luve i Keresoni.
9 Era sa qai reki na tamata, ni ra soli ena yalo vinaka, ena yalo e dina era sa solia kina e na yalo rawarawa vei Jiova; ia o Tevita na tui sa reki vakalevu talega.
10 O koya oqo sa ia o Tevita na vakavinavinaka vei Jiova ena matadra nai soqosoqo taucoko; ka sa tukuna o Tevita: "O ni sa kalouvinaka, i Jiova na Kalou i Isireli, na tamai keimami, me sega ni mudu.
11 Sa Nomuni, i Jiova, na cecere, Na Kaukauwa kei na Lagilagi, Na qaqa kei na ka vaka-Turaga; Ni sa Nomuni na ka kecega mai Lomalagi kei Vuravura; Sa Nomuni na Matanitu, i Jiova, Ka o Ni sa laveti cake me ulu ni veika kecega.
12 E rau sa lako mai vei Kemuni nai yau kei na vakarokoroko, Ia o Ni sa lewa na ka kecega. Sa tu e Ligamuni na kaukauwa kei na gumatua; E Ligamuni sa caka kina me rawa na ka levu Ka solia na kaukauwa vei ira kecega.
13 "O koya oqo, neimami Kalou, Keimami vakavinavinaka vei Kemuni Ka vakacaucautaka na Yacamuni Lagilagi.
14 Ia o cei oi au, o cei talega o ira na noqu tamata, Me rawa ni keimami soli vakaoqo ena yalo vinaka? Ni sa vu mai vei Kemuni na ka kecega, Ni keimami sa solia vei Kemuni na ka ga e Nomuni.
15 Ni keimami sa vulagi ka dau veitokiyaki voli e Matamuni, Me vakataki ira na tamai keimami; Na neimami veisiga e vuravura sa vaka ga na yaloyalo, Ka sa yali nai nuinui.
16 "I Jiova na neimami Kalou, nai yau vakaitamera keimami sa vakarautaka tu oqo me keimami tara kina vei Kemuni e dua na vale ki na Yacamuni Tabu sa mai na Ligamuni, ka sa Nomuni kecega.
17 "Au sa kila talega, noqu Kalou, ni o Ni sa dauvakatovolea na yalo ka sa dauvinakati ira na yalododonu. Io oi au, ena dodonu ni yaloqu au sa solia kina ena yalo rawarawa na veika oqo; ia oqo au sa qai reki ni'u sa raici ira na Nomuni tamata, ni ra sa tu eke mera solia ena yalovinaka vei Kemuni.
18 "I Jiova na Kalou i Eparaama, Aisake, kei Isireli, o iratou na tamai keimami, Mo ni vakadeitaka me Sega ni mudu na nodra lomadei e na vakanananu ni yalodra na Nomuni tamata, ka me ra vagolea na yalodra vei Kemuni.
19 "Ka solia vei Solomoni na luvequ na yalo e dina me maroroya kina na Nomuni i vakaro kei na Nomuni i vakadinadina, kei na Nomuni lesilesi, me na cakava kina na ka kecega oqo, ka me na tara na vale tabu au sa vakarautaka oti tu na kenai yaya."
20 Sa qai tukuna o Tevita vei ira nai soqosoqo taucoko, "Ia oqo mera vosa vakalouvinakataki Jiova na Kalou" Tamadra o ira kecega na Isireli, era sa qai vakacuva ulu ka vakarokoroko ena matai Jiova kei na tui.
21 Era sa ia na vakacaboi soro vei Jiova ka cabora nai soro kama vei Jiova ena siga e tarava: e dua na udolu na bulumakau tagane, e dua na udolu na sipi tagane, e dua na udolu na lami, kei nai madrali gunuvi; kei nai madrali e vuqa me rauti ira kecega na Isireli.
22 Ia era sa kana ka gunu kecega ena matai Jiova ena marau levu ena siga o ya. Ka ra sa vakatikori Solomoni e nai karua ni gauna me tui, ka lumuti koya ena matai Jiova me nodra i liuliu, kei Setoki me bete.
23 Sa qai dabeca o Solomoni nai cewacewa i Jiova me sa tui ni sa sosomitaki Tevita na tamana, ka sa tamata yaco; era sa talairawarawa vua na Isireli kecega.
24 O ira nai liuliu kece sara kei ira na tamata qaqa, kei ira talega na luve i Tui o Tevita tagane, era sa soli ira kivei Solomoni na Tui.
25 Ia sa vakalevulevui Solomoni vakalevu o Jiova ena matadra na Isireli taucoko, ka solia vua na ka vakaturaga e se bera ni bau soli kivua e dua na tui sa liu vei koya.
26 Ia o Tevita na luve i Jese tagane sa lewa e Isireli taucoko.
27 Ia na gauna taucoko ni nona lewa sa vasagavulu na yabaki; e lewa mai Epironi me vitu na yabaki, ka tolusagavulu katolu na yabaki na nona lewa mai Jerusalemi.
28 Ia sa mate o koya ni sa qase sara, sa levu na nona veisiga vinaka kei na yau kei na vakarokoroko; ka sa lewa me kenai sosomi o Solomoni na luvena.
29 Ia oqo na cakacaka kecega i Tevita na Tui, kenai matai ki na kenai otioti, io era sa volai kecega e nai vola i Samuela na parofita, e nai vola i Necani na parofita, kei nai vola i Kata na parofita.
30 kei na nona lewa kecega kei na nona kaukauwa, kei na veika e yacovi koya, kei Isireli, kei ira na veimatanitu kecega ni veivanua.