1 Veigauna

Chapter 19

Sa yaco ni sa oti oqo sa mate o Neasi na nodra tui na kai Amoni, ka tui me kenai sosomi na luvena tagane.
2 Sa qai tukuna o Tevita, "Au na vakaraitaka na yalololoma vei Anani na luve i Neasi tagane, baleta ni a vakaraitaka o tamana kivei au na yalololoma." Sa mani tala eso na nona mata o Tevita mera la'ki vakacegui koya ena vukui tamana. Ia era sa lako vei Anani na tamata i Tevita me vakacegui koya.
3 Ia era sa tarogi Anani o ira era turaga vei ira na nona tamata, "O sa nanuma li ni dokai tamamuni dina o Tevita ni sa talai ira mai na nona tamata mera mai vakacegui iko? Era sega beka ni lako mai na nona tamata mera mai rai vanua ka qara se me vuaviritaka vakacava na noda vanua?"
4 O koya oqo sa mani tauri ira na tamata i Tevita o Anani, sa tasia, ka sedrutia na nodra i sulu e lomadonu, kei na mudratou, ka vakatalai ratou tani yani.
5 Era sa qai lako eso vei Tevita ka tukuna na veika sa caka vei iratou na tamata; ka sa tala o koya eso mera tavaki iratou, ni ratou sa madua vakalevu sara. Ka sa tukuna na tui, "Dou wawa tiko mai Jeriko me yacova ni sa tubu tale na kumimudou, dou qai lesu mai."
6 Ni ra sa raica na kai Amoni ni ra sa velavela e na matai Tevita, sa vakauta o Anani kei ira na kai Amoni e dua na udolu na taledi na siliva me voli kina eso na qiqi ni valu kei na so na dauvodo ose mai Mesopotemia, mai Meaka e Siria, kei Soba.
7 Ia era sa voli rawa e tolusagavulu ka rua na qiqi-ni-valu, vata kei tui Meaka kei ira na nona tamata, era sa ma tuvai valu mai Medeba. O ira talega na kai Amoni era sa soqoni vata mai na nodra veikoro, ka lako mai ki nai valu.
8 Ia oqo ni sa rogoca o Tevita, sa talai Joave kei ira kecega na mataivalu qaqa.
9 Era sa qai lako mai na kai Amoni ka tuvai valu ena mata ni matamata kina koro, ka ra mai tu vakai ira e na rara ni valu o ira na tui era a lako vata mai.
10 Ni sa raica o Joave ni tuva nai valu e matana ka tu talega mai dakuna, sa digitaka o koya eso na tamata e uasivi cake vei ira kecega na Isireli, ka biuti ira mera veivala kei ira na kai Siria.
11 Ia o ira kecega na kena vo sa solia o koya vei Avisai na tacina me liutaka, ka ra sa tuvai valu vei ira na kai Amoni.
12 Sa qai tukuna o koya, "Kevaka era sa gumatua vei au na kai Siria, mo na qai vukei au; ia kevaka era sa gumatua vei iko na kai Amoni, au na qai vukei iko.
13 "Mo yaloqaqa, ka me daru kaukauwa ena vukudra na nodaru tamata kei na veikoro ni noda Kalou. Ka me na cakava o Jiova na ka sa dodonu e Matana."
14 Ia sa toro voleka vei ira na kai Siria o Joave kei ira na tamata era tikovata tukuna me veivala, ka ra sa dro e matana o ira na kai Siria.
15 Ni ra sa raica o ira na kai Amoni ni sa dro o ira na kai Siria, era sa dro talega ena matai Avisai na tacina, ka curu ki na koro. Sa mani lako i Jerusalemi o Joave.
16 Ia oqo ni ra sa raica na kai Siria ni ra sa druka vei Isireli, era sa talai ira na dau ni tukutuku mera kau mai na kai Siria era tu mai na tai kadua ni Uciwai, kei Sovaki na turaganivalu liu i Adadesa me lako mai ki matadra.
17 Ni sa mai tukuni vei Tevita, sa vakasoqoni ira vata na Isireli, era takosova na Joritani ka valuti ira, ka tuvai valu vei ira. Ia ni sa tuvai valu o Tevita vei ira na kai Siria, era sa qai veivala kei koya.
18 Era sa qai dro na kai Siria e matadra na Isireli; ka sa vakamatea o Tevita e vitu na udolu na dauvodo qiqi-ni-valu kei na vasagavulu na udolu na sotia taubale, ka vakamatei Sovaki talega na turaganivalu liu.
19 Ia ni ra sa raica na dauveiqaravi i Adadesa ni ra druka vei Isireli, era sa vakaveivinakatitaki ira kei Tevita ka yaco mera nona dauveiqaravi. Era sa mani sega ni via vukei ira tale vakadua na kai Amoni o ira na kai Siria.