1 Veigauna

Chapter 16

Era sa kauta mai na kato ni Kalou, ka vakadabera e na loma donu ni vale ni soro sa birika o Tevita. Era sa qai cabora nai soro kama kei nai soro ni veivinakati e na mata ni Kalou.
2 Ia ni sa oti na nona vakacabora nai soro kama kei nai soro ni veivinakati o Tevita, sa vosa vakalouvinakataki ira na tamata o koya e na yaca i Jiova.
3 Sa qai wasea vei ira kecega na Isireli, na tagane kei na yalewa, vei ira yadua e dua nai buli madrai, dua na tiki ni lewe ni manumanu, kei na dua nai buli keke vua ni kau.
4 Ka sa lesia eso na Livai me ra veiqaravi e na mata ni kato i Jiova, mera veivakananumi, vakavinavinaka, ka vakalavelaveti Jiova na Kalou nei Isireli:
5 O Esava sa liu, e tarava o Sakaraia, qai o Jeieli, Semiramoci, Jeieli, Maticia, Iliavi, Penaia, kei Opeti-Itomi: O Jeieli e qiria nai vakatagi vakawa kei na Api, ia o Esava e vakatagitaka na sibali;
6 O Penaia kei Jeasieli na bete e rau uvuca na biukila ena mata ni kato ni veiyalayalati ni Kalou. Na Sere Ni Vakavinavinaka I Tevita
7 Ena siga o ya sa solia kina o Tevita nai matai ni same oqo vei Esava kei ira na wekana, mera vakavinavinakataki Jiova:
8 O, me soli na vakavinavinaka vei Jiova! Masuta na Yacana; Vakatakila na Nona cakacaka ena kedra maliwa na Nona tamata!
9 Sere Vua, seretaka na Same ki Vua; Tukuna na Nona cakacaka veivakurabuitaki kecega!
10 Me vaqoroqoroi ena Yacana tabu; Mera cakava na yalo sa reki o ira sa vakasaqarai Jiova!
11 Vakasaqarai Jiova kei na Nona kaukauwa; Vakasaqara tikoga na Matana!
12 Vakananuma na Nona cakacaka taleitaki sa cakava oti, Na Nona cakacaka veivakurabuitaki, kei na vakatulewa ni Gusuna,
13 Oi kemudou na kawa i Isireli na Nona tamata, oi kemudou na luve i Jekope, na Nona tamata digitaki!
14 O Koya o Jiova na noda Kalou; Na Nona vakatulewa sa tu e vuravura taucoko.
15 Vakananuma na Nona Veiyalayalati sega ni mudu, Na vosa sa vakarota o Koya, me baleta nai tabatamata e dua na udolu,
16 Na veiyalayalati sa cakava vata kei Eparaama, Kei na Nona vosa bubului vei Aisake,
17 Ka sa vakadeitaka vei Jekope mei lesilesi, Kivei Isireli me veiyalayalati e sega ni mudu,
18 E tukuna, "Au na solia vei iko na vanua o Kenani Me nodra i votavota na nomu kawa,"
19 Ni dou a se lewe vica walega, sa dina ni dou se lewe vica ga, ka tiko vulagi kina.
20 Ni ra sa lako mai na dua na vanua ki na dua tale, Mai na dua talega na matanitu ki na dua na mata tamata,
21 E sega ni vakatara o Koya vua e dua na tamata me cakava vei ira na ka ca; Io, e vunauci ira na tui e na vukudra,
22 Ka vaka, "Kakua ni tarai ira na Noqu i lumuti, Ka kakua ni vakamavoataki ira na Noqu parofita."
23 Sere vei Jiova, na vuravura kecega; Dou tukuna nai tukutuku vinaka ni Nona veivakabulai mai na siga e dua ki na siga ka tarava.
24 Vakatakila na Nona lagilagi e na kedra maliwa na veivanua, Na Nona veivakurabuitaki ena kedra maliwa na tamata kecega.
25 Ni sa levu o Jiova ka sa dodonu me vakalevulevui na Nona levu; E dodonu talega o Koya me rerevaki vakalevu cake mai vei ira na kalou tani kecega.
26 Ni ra sa matakau ceuceu walega na nodra kalou na tamata kecega, Ia o Jiova sa bulia na lomalagi.
27 Na vakarokoroko kei na vakaturaga sa tu ga e matana; Na kaukauwa kei na marau sa tiko e na Nona i tikotiko.
28 Solia vei Jiova, oi kemudou na vei vuvale ni tamata, Solia vei Jiova na lagilagi kei na kaukauwa.
29 Dou solia vei Jiova na vakarokoroko e kilikili kei na Yacana; Kauta mai nai soro, ka lako mai ki na Nonai Serau. Io, dou lotu vei Jiova ena totoka ni yalosavasava!
30 Dou sautaninini e Matana, na vuravura kecega. O vuravura talega sa vakadeitaki tu, E na sega ni yavalati rawa.
31 Me reki o lomalagi, ka me marau o vuravura; Ka me ra tukuna ena kedra maliwa na veivanua, "Me vakatulewa o Jiova."
32 Me vadugu na wasawasa, kei na ka kecega e tu kina; Me reki na vei-were, kei na ka kecega sa bula kina.
33 Era sa na qai reki na vei vunikau mai veikau ena mata i Jiova, Ni sa lako tiko mai o Koya me mai lewai vuravura.
34 Io, dou vakavinavinaka vei Jiova, ni sa vinaka o Koya! Ni sa sega ni mudu na Nona yalololoma.
35 Ka tukuna, "Mo ni vakabulai keimami, na Kalou ni neimami vakabulai; Ni vakasoqoni keimami vata, ka vakabulai keimami mai vei ira na kai matanitu tani, Me keimami vakavinavinakataka na Yacamuni savasava, Me keimami qaqa ena Nomuni vakavinavinakataki."
36 Me lagilagi na Yacai Jiova na Kalou ni Isireli Mai na sga ni mudu ki na sega ni mudu! Ka ra sa tukuna na tamata kecega, "Emeni!" ka vakavinavinakataki Jiova. Sa Vakayacori Tikoga Na Lotu Ena Veigauna
37 Sa mani laivi Esava tiko kei iratou na tacina e kea ena mata ni kato ni veiyalayalati i Jiova me ratou veiqaravi voli ena mata ni kato e na veigauna kecega, me vaka na cakacaka ni veisiga e gadrevi;
38 ia o Opeti-Itomi vata kei iratou na wekana e lewe onosagavulu ka walu, e wili kina o Opeti- Itomi na luve i Jeducuni tagane, kei Osa, me ratou i vakatawa ni matamata;
39 ia o Setoki na bete kei ira na veitacini vaka matabete, me ra tiko ena mata ni vale ni soroi Jiova ena veivanua cecere e tiko mai Kipioni,
40 mera vakacabora nai soro kama vei Jiova e nai cabocabo ni soro kama ena veimataka kei na veiyakavi, ka me ra cakava me vaka na ka kecega sa volai e nai vunau i Jiova ka a vakarota vei Isireli;
41 Sa tiko vata kei ira o Emani kei Jeducuni kei ira na kena vo era sa digitaki, era sa kacivi ena dui yacadra, mera vakavinavinakataki Jiova, ni sa sega ni mudu na Nona yalo loloma;
42 ia sa tu vata kei ira o Emani kei Jeducuni, me rau uvuca na biukila ka qiria na sibali kei nai yaya kece ni vakatagi vua na Kalou. Ia oqo e ratou sai vakatawa ni matamata na luve i Jeducuni.
43 Era sa qai dui lako na tamata kecega, o ira yadua ki na nodra dui vale; ka sa lesu talega o Tevita ki nodratou me la'ki vosa vakalouvinakataka.