1 Tawarikh

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

Chapter 22

Lheueh nyan geupeugah lé Nabi Daud, "Diteumpat nyoe kheueh nyang harôh teupeudong Baét TUHAN Allah. Dan dimiseubah nyoe kheueh ureuëng Israel harôh jipeuseumah keureubeuen nyang teutot keu TUHAN."
2 Nabi Daud laju geuyue peusapat banmandum ureuëng aséng nyang na tinggai di nanggroe Israel, laju gobnyan geuyue jok buet keu awaknyan. Siladum nibak awaknyan geuyue peut batée keu teupeugöt Baét TUHAN.
3 Keu teupeugét labang ngon eunsée keu pintoe-pintoe geureubang Baét TUHAN nyan, laju geupeusapat beuso nyang le that lé Nabi Daud. Meunan cit deungon peurunggu le that cit geupeusapat, sabab le that atranyan ka hana hase le teutimang.
4 Ubak ureuëng Tirus dan Sidon geupeusan kayée ceumara Libanon nyang le that.
5 Banmandum nyang geukeureuja lé Nabi Daud nyan na kheueh kareuna gobnyan geupike lagéenyoe: "Ulôn harôh ulôn peusiab peue nyang paleng peureulée keu teupeudong Baét TUHAN. Sabab Nabi Sulaiman aneuëk agam ulôn mantong that muda dan gohlom na peungalaman, seudang Baét TUHAN nyang teuma teupeudong nyan harôh nyang gét meugah dan meusyeuhu bansaboh donya." Dan sigohlom Nabi Daud meuninggai donya, bahan bangunan nyang teupeureulée keu teupeudong Baét TUHAN ka seb le.
6 Nabi Daud laju geuhôi aneuëk agam gobnyan nyang nan Nabi Sulaiman nyan, dan bak aneuëk geuhnyan geupeurintah laju mangat Nabi Sulaiman nyan geutem peudong baét keu TUHAN Allah nyang jiseumah lé umat Israel.
7 Geupeugah lé Nabi Daud ubak Nabi Sulaiman aneuëk gobnyan nyan, "Hai aneuëk ulôn, katreb that-that ulôn naniet keuneuk peudong saboh rumoh keuteumpat ulôn horeumat TUHAN Allah ulôn.
8 Teuma lé TUHAN geupeugah ubak ulôn bahwa ulôn ka kayém that ulôn muprang dan ka ulôn poh maté ureuëng jai lumpah na. Lé sababnyan Gobnyan hana geubri idhin keu ulôn mangat lôn peudong baét keu Gobnyan.
9 Teuma pi meunan, Gobnyan ka geumeu janji ubak ulôn nyang geupeugah lagéenyoe: 'Gata meuteumé sidroe aneuëk agam nyang mat peurintah deungon aman teuntram, sabab Ulôn kutulông jihnyan sampoe hanale musoh nyang jijakprang jihnyan. Aneuëk nyan teuma teuboh nan Sulaiman sabab simantong jihnyan jimat keurajeuen, Ulôn teutab Ulôn bri keuteuntraman dan keuamanan bansaboh nanggroe Israel.
10 Aneuëk agam gatanyan kheueh nyang teuma peudong baét keu Ulôn. Jihnyan teuma jeuet keu aneuëk Ulôn dan Ulôn teuma jeuet keu bapak jih. Takhta keurajeuen Israel teutab nibak keuturonan jihnyan sampoe siumu masa.' "
11 Dan geupeugah lom lé Nabi Daud, "Jinoenyoe hai aneuëk ulôn, seumoga TUHAN Po teu Allah gata sabena meusajan gata dan geutulông gata. Dan seumoga gata meuhase tapeudong baét keu TUHAN lagée nyang ka geupeujanji nyan.
12 Dan mudah-mudahan TUHAN Po teu Allah gata geubri keu gata keubijaksanaan dan peungeurtian mangat jeuet tapeurintah ateueh Israel nyang paih deungon huköm-huköm Gobnyan.
13 Meunyoe gata tataát ubak banmandum huköm nyang ka geubri ubak Nabi Musa keu bansa Israel, teuma gata teutab meuhase. Gata harôh yakén dan gata jeuet. Bék tatakot keuhai peue mantong.
14 Keuhai Baét TUHAN nyan ulôn ka lôn meu-useuha bit-bit that mangat lôn jak peusapat 3.400 ton méuh dan leubeh nibak 34.000 ton pirak. Seulaén nibak nyan na peurunggu dan beuso nyang hana teuitong le jih. Meunan cit deungon kayée dan batée ka cit ulôn keubah, teuma gata harôh tatamah lom atra nyan.
15 Bak gata ramé ureuëng meukeureuja nyang jitem jakbuet. Na nyang jeuet jimeubuet bak tambang batée, na tukang kayée, tukang batée dan le lom tukang pade nyang carông jipeugét
16 méuh, pirak, peurunggu dan beuso. Gata peuphon kheueh laju phon saát nyoe! Seumoga TUHAN geutulông gata."
17 Dan Nabi Daud pih geukrah laju banmandum peumimpén Israel jijak tulông Nabi Sulaiman.
18 Geupeugah teuma lom, "TUHAN Po teu Allah gata ka geutulông gata, dan geubri damé ngon teuntram bansaboh nanggroe. Gobnyan ka geupeumungken ulôn sampoe hase ulôn peutaloe banmandum bansa nyang yoh watée ilée tinggai dinanggroe nyoe. Teuma jinoenyoe awaknyan ka taklok ubak gata dan ubak TUHAN.
19 Lé sabab nyan kheueh gata rameungabdi ubak TUHAN Po teu Allah gata deungon sigeunab jiwa raga gata. Neupeuphon kheueh peudong baét keu TUHAN, mangat Peuto Peujanjian Gobnyan dan banmandum peukakaih nyang laén nyang teupeungui khusos keu iébadat jeuet teukeubah disinan."