1 Tawarikh

Chapter 16

Peuto Peujanjian nyan geukeubah didalam khimah nyang ka geuseudia lé Nabi Daud keu Peuto nyan. Laju awaknyan jipeuseumah keu Allah keureubeuen nyang teutot dan keureubeuen peudaméan.
2 Óh ka lheueh Nabi Daud seuleusoe geupeuseumah keureubeuen-keureubeuen nyan, lé gobnyan laju geubri beureukat keu rakyat ateueh nan TUHAN,
3 dan óh lheuehnyan geubagi-bagi laju peunajoh keu awaknyan banmandum. Soe mantong ureuëng nyang na disinan bah kheueh nyan ureuëng agam meunan cit ureuëng inong meuteumé jeumba sikrak uengkot sie panggang, ruti dan juadah kismis.
4 Nabi Daud geu baiát teuma na meupadubdroe Lewi keu jipimpén upacara iébadat ubak TUHAN, Allah Israel, dikeue Peuto Peujanjian nyan, deungon meunyanyoe dan seumah ngon pujo.
5 Asaf geupiléh sibagoe peumimpén nyang phon dan Zakharia sibagoe waki gobnyan. Yeiel, Semiramot, Yehiel, Matica, Eliab, Benaya, Obed-Edom dan Yeiel geubri tugaih keu jipeumeu-én alat keucapi. Seudangkan Asaf geubri tugaih keu teupeumeu-én simbal,
6 dan dua droe teungku imeum, na kheueh Benaya dan Yahaziel, geubri tugaih seucara teutab geuyueyueb beureuguih dikeue Peuto Peujanjian nyan.
7 Nyang kheueh phon-phon that Nabi Daud geubri tugaih keu Asaf dan rakan-rakan gobnyan mangat jeuet jimeuca-e lagée nyang teupujo keu TUHAN.
8 Meusyukoe kheueh ubak TUHAN tapeusampoe kheueh keubeusaran Gobnyan, tapeugah kheueh buet-buet Gobnyan ubak bansa-bansa.
9 Tameuca-e ngon tameunyanyoe kheueh puja ngon pujo ubak TUHAN, tapeusampoe kheueh peue mantong buet-buet Gobnyan nyang luwa biasa.
10 Gobnyan kheueh TUHAN Nyang Mahaesa; meusuka cita kheueh, sabab geutanyoe nyoe na kheueh milék Gobnyan; soemantong nyang jiseumah Gobnyan bah kheueh ji meusukaria ngon geumbira.
11 Lakée kheueh teunaga nibak Gobnyan, seumah kheueh Gobnyan bubekna reuda.
12 Hai keuturonan Nabi Yakub, hamba Po teu Allah! Hai keuturonan Israel, umat nyang ka geupiléh! Ingat kheueh banmandum buet nyang ajaéb nyang ka geupeubuet, bék kheueh tuwoe ubak peue nyang ka geupeuputôh.
14 TUHAN na kheueh Po teu Allah geutanyoe, keuputosan Gobnyan teutab teungui bansigom donya.
15 Gobnyan sabe geuingat ubak janji Gobnyan, janji Gobnyan teutab teungui keu siumu masa.
16 Peujanjian nyan ka lheueh geupeugöt deungon Nabi Ibrahim, dan óh lheuehnyan teuma deungon Nabi Ishaq,
17 laju geupeukong janjinyan deungon Nabi Yakub, jeuet keujanji nyang keukai keu umat Israel.
18 Kheun Gobnyan, "Tanoh Kanaan teuma Ulôn bri keu gata jeuet keuhak milék pusaka gata."
19 Yohmasa ilée umat TUHAN udeb lagée ureuëng aséng di nanggroe nyan jeumeulah awaknyan na bacut that-that.
20 Awaknyan jijak meurawöh nibak saboh bansa ubak bansa nyang laén, jiminah nibak saboh nanggroe ubak nanggroe nyang laén.
21 Teuma TUHAN hana geupeubiyeu soe mantong nyang jikeuneuk teugon awaknyan; deumi awaknyan, dumna raja-raja ka geupeuingat,
22 "Bék tapeukaru ureuëng-ureuëng nyang ka Ulôn piléh, bék tapeubuet buet nyang jeuhet ateueh nabi-nabi Ulôn."
23 Meuca-e ngon meutaseubéh kheueh keu TUHAN, hai bumoe nyoe banmandum, tieb-tieb uroe tajak peumaklum kheueh haba geumbira bahwa Gobnyan ka geupeuseulamat geutanyoe.
24 Tajak peugah kheueh keuagongan Gobnyan ubak mandum bansa, dan buet-buet Gobnyan nyang peukasa keu umat manusia.
25 Sabab TUHAN lumpah that raya dan lumpah teupujo; Gobnyan harôh tatakot beuleubeh nibak tatakot keu dewa.
26 Dewa-dewa bansa laén na kheueh patong beurala teuma TUHAN na kheueh nyang cebta angkasa raya.
27 Gobnyan peunoh deungon keuagongan dan keumuliaan, rumoh Gobnyan peunoh deungon kuasa dan suka cita.
28 Pujoe kheueh TUHAN, hai umat manusia! Pujoe kheueh keuagongan dan teunaga Gobnyan.
29 Pujoe kheueh nan Gobnyan nyang mulia, dan taba kheueh keureubeuen u baét Gobnyan. Seumah kheueh TUHAN deungon tangui peukayan iébadat!
30 Beuyo kheueh gata meunyoe dikeue Gobnyan, hai banmandum donya! Bumoe nyoe kukoih hán ék so guncang.
31 Hai langét ngon bumoe, meugeumbira kheueh! Tapeugah kheueh ubak bansa-bansa bahwa TUHAN nyan Raja!
32 Hai bakat ngon geulumbang di laôt meugeumuroh kheueh meusigoe ngon asoe jih! Meusukacita kheueh hai padang deungon banmandum seunaman!
33 Bak-bak kayée nyang na diglé teuma jiseumurak geumbira sabab TUHAN ka teuka keu geujak peurintah bumoe.
34 Meusyukoe kheueh ubak TUHAN sabab Gobnyan jroh that; geunaséh Gobnyan keukai dan abadi.
35 Tapeugah kheueh, "Ya Allah, Peuseulamat kamoe, neupeuseulamat kheueh kamoe nibak keukuasaan bansa-bansa dan neupeusapat kheueh kamoe lom mangat kamoe jeuet kamoe ucab syukoe dan kamoe pujoe nan Droeneueh nyang suci!"
36 Pujoe kheueh TUHAN, Allah Israel, phon saátnyoe sampoe siumu masa! awaknyan jipujoe TUHAN.
37 Óh lheuehnyan lé Raja Nabi Daud geubri tugaih keu Asaf dan ureuëng-ureuëng Lewi nyang laén mangat teutab jiuruih hai-hai nyang na sangkot paôt jih deungon iébadat di teumpat Peuto Peujanjian TUHAN teukeubah. Tieb-tieb uroe awaknyan harôh meutugaih disinan,
38 jitulông lé Obed-Edom aneuëk Yedutun, dan 68 droe nyang laén nyang saboh kawöm deungon gobnyan. Obed-Edom dan Hosa na kheueh nyang kawai babah pintoe geureubang.
39 Teuma Zadok dan teungku-teungku imeum nyang laén nyang geubri tugaih keu teutab teu-uroih iébadat di teumpat iébadat di Gibeon.
40 Tieb-tieb beungoh dan seupôt awaknyan harôh jipeuseumah keureubeuen nyang teutot di ateueh miseubah nyang sisuai deungon huköm-huköm nyang geubri lé TUHAN keu ureuëng Israel.
41 Teungku Imeum Zadok dan teungku-teungku imeum nyan deungon jitulông lé Heman dan Yedutun meunan cit deungon ureuëng-ureuëng nyang laén nyang khusos teupiléh keu ureuëng nyang meuca-e puja ngon pujo keu TUHAN sabab geunaséh Geuh nyang keukai dan abadi.
42 Meunan cit deungon Heman dan Yedutun jimeutugaih nibak beureuguih, simbal dan alat musik nyang laén nyang teupeumeu-én keu teuiréng ca-e ngon nyanyoe puja dan pujo nyan. Anggota-anggota kawöm Yedutun geubri tugaih mangat jikeumiet babah pintoe geureubang.
43 Óh ka lheueh nyan jiwoe kheueh mandum ureuëng u rumoh jih maséng-maséng. Meunan cit deungon Nabi Daud geujakwoe u rumoh geuh geujak saweue keuluwarga gobnyan.