Taitusi

Chapter 3

Vakananumi ira me ra dautalairawarawa vei ira na i liuliu kei ira na Turaga, me ra dautalairawarawa, me ra vakarau tu me ia na i valavala kecega e vinaka.
2 Me ra kakua ni vosavakacacataka e dua na tamata, me ra kakua ni dauveiba, me ra yalomalua me ra yalomalumalumu sara vei ira kecega na tamata.
3 Nida a lialia e liu oi keda talega, eda a dautalaidredre, eda a dauvakacalai, eda a dauvakayacora na gagadre ca kei na marau vakalialia, e da a dauloma ca ka vuvu, e da a bulataka na bula e vakasisila, e da sa dauveicati vakataki keda.
4 Ia ni sa rairai mai vei keda na tamata na yalovinaka kei na yalololoma ni Kalou na noda i Vakabula.
5 Sa qai vakabulai keda o Koya, sa sega ga ena vuku ni cakacaka dodonu e da sa kitaka, ena vuku ga ni Nona loloma, ena i silisili ni sucu tale, kei na veivakavoui ni Yalo Tabu,
6 O koya sa sovaraka vakalevu vei keda ena vuku i Jisu Karisito na noda i Vakabula.
7 Meda vakadonui kina ena Nona loloma walega, ka meda yaco meda i taukei ni bula sega mudu sa vakanuinuitaki.
8 Sa dina na vosa, ka'u sa vinakata mo vakadinadinataka tikoga na ka oqo, me ra gumatua ni kitaka tiko na i valavala vinaka o ira era sa vakabauta na Kalou, sa vinaka na ka oqo, ka yaga vei ira na tamata.
9 Ia na ka lialia sa dauveiletitaki mo biuta ga, kei na i vola ni kawa, kei na veiba, kei na dauveiletitaka na Vunau; ni sa sega ni yaga oqo, ka sa ka walega.
10 A tamata sa dauvakavuvuli vakatani mo biuta ni sa vunauci mada e liu vakadua ka vakarua,
11 Na tamata vaka oqori sa veivakacalai ka i valavala ca, ka beitaki koya vakataki koya.
12 Ni'u sa talai Aritema vei iko, se o Tikiko, mo gumatua mo lako mai vei au ki Nikopoli, ni'u sa nanuma me'u na tikoga kina ena vula i liliwa.
13 Gumatua mo kauti Sina na Vu ni Vunau, kei Apolosa, ena nodrau i lakolako, ka me kakua na ka e yali vei rau.
14 Mera vakavulici talega na i Soqosoqo Lotu ena cakacaka vinaka, me rawa ni ra sotava kina na leqa tubu koso, de ra na qai sega ni yaco mera vuavuai.
15 O ira kecega sa tiko kei au era sa loloma tu yani vei iko. Au sa loloma vei ira e ra sa lomani keitou ena vuku ni vakabauta. Me nomudou kecega na loloma. Emeni.