Taitusi

Chapter: 1 2 3


-Reset+

Chapter 1

1 Oi au o Paula, na i Talatala ni Kalou kei na apositolo i Jisu Karisito, ena vuku ni nodra vakabauta na sa digitaki ira na Kalou, kei na vakatusa na i vakavuvuli dina ka vakalotu.
2 Me vakanuinuitaki na bula sega ni mudu o koya sa yalataka e liu na Kalou, o Koya sa sega ni lasu rawa ea qai vakatekivu e muri o vuravura.
3 Ia sa vakaraitaka ena Nona Vosa ena kena gauna ni sa vunautaki, ka'u sa lesi kina me'u ia me vaka na Nona Vosa na Kalou na noda i vakabula;
4 Vei Taitusi na luvequ dina, me vaka na vakabauta sa tu vei keda kecega: me sa nomu na loloma, na yalololoma, na vakacegu, mai Vua na Kalou o Tamada kei na Turaga o Jisu Karisito na noda i Vakabula.
5 Au a laivi iko mai Kiriti mo rawa ni vakadodonutaka na veika sa vo tiko, ka mo lesia na Qase era vakadonui ki na vei koro yadudua, me vaka ka'u a vakarota vei iko.
6 Kevaka e dua sa sega ni cala ka sa vakawati ga vakadua, a ra sa vakabauta o ira na luvena, ka sa sega ni beitaki vei ira na i valavala vakatani se na talaidredre.
7 Ni sa dodonu me sega ni cala na Qase, me vaka sa i Talatala ni Kalou, me kakua ni domoqa, me kakua ni daucudrucudru me kakua ni daugunu yaqona, me kakua ni dauveiba, me kakua ni daudomona na i lavo.
8 Ia me dauvakacegui ira na vulagi, me daulomani ira na tamata vinaka, me yalomatua, me yalododonu, me yalosavasava, me dau taura na yalona.
9 Taura matua na i vakavuvuli dina o sa vakatavulici kina, me rawa kina ni o vakarota na i vakavuvuli sa vinaka ka vunauci ira talega era sa vosa vakatani.
10 Ni ra sa lewe vuqa era sa i valavala vakatani, era dautalanoa walega ka dauveivakaisini, ka vakauasivi vei ira sa cilivi.
11 Ka sa dodonu me vagalui na gusudra, ni ra sa vakacalai ira kece na lewe ni vale e so, ni ra sa vakatavulica na ka sa sega ni kilikili, ena vuku ni yau vakasisila.
12 E dua vei ira, a nodra parofita, sa tukuna, "A nodra i tovo ga na kai Kiriti me ra daulasu, ka i tovo vakamanumanu, era sa daukana ka vucesa."
13 Sa dina na i tukutuku oqo. O koya oqo mo qai vunauci ira vakaukauwa me vinaka kina na nodra vakabauta.
14 Mera kakua ni nanuma na i tukuni walega vaka Jiu, se na nodra vei vakaro na tamata era sa lesu tani mai ena i vakavuvuli dina.
15 Sa savasava na ka kecega vei ira sa yalosavasava, ia vei ira sa dukadukali ka sega ni vakabauta sa sega na ka sa savasava, ia sa dukadukali na nodra lewa e loma kei na nodra vakanananu.
16 Era tukuna ni ra kila na Kalou, ia ena nodra i valavala era sa cakitaka ni ra sa tamata vakasisila, ka talaidredre, ka sega ni yaga kina dua na cakacaka vinaka.