Dauvunau

Chapter 8

O cei sa vuku? Me kila nai vakavakadewa ni ka? Na yalomatua ni tamata sa vakararamataka na matana, na ca ni matana sa veisau.
2 Au sa vakasalataki iko, "Maroroya na nona i vakaro na tui, ena vuku ni nomu yalayala vua na Kalou.
3 "Mo kua ni lako vakatotolo mai matana. Mo kua ni tu ena ka e ca, ni sa cakava ga o koya na ka sa vinaka vua."
4 Sa tiko na kaukauwa ena vanua sa tiko kina na nona vosa na tui. O cei me na tukuna vua, "Na cava o sa cakava tiko?"
5 O koya sa muria na nona vosa, sa tiko vinaka tiko, na tamata vuku sa kila vinaka na gauna kei na lewa,
6 E na veika kece, sa tu na gauna, sa tu talega na lewa. E dina sa qai levu ga na leqa ni tamata.
7 Sa sega ni kila o koya na cava ena yaco; o cei ena tukuna vua na ka ena yaco?
8 Sa sega e dua sa tu vua na kaukauwa me lewa na yalo ka taura tiko na yalo, Sa sega e dua me lewa na siga ni mate. Sa sega na veisereki e nai valu o ya, Na caka ca ena sega ni sereki ira rawa nai lawalawa sa soli yani vei koya.
9 Au sa raica na ka kece oqo, au sa biuta ki na yaloqu na cakacaka kece sa caka ena ruku ni matanisiga oqo: Sa dua na gauna sa soli lewa kina e dua vua tale e dua, a sa mavoa ga kina o koya sa solia na lewa.
10 Au sa raica ni ra sa buluti na tamata ca, o ira sa dau lako mai, ka lako yani ki na vanua tabu, e ra sa guilecavi mai na koro era sa tiko kina, oqo talega sa ka wale.
11 Na totogi ena vukui koya sa cakava na ka ca, sa sega ni caka vakatotolo, o koya oqo sa gole tiko ga kina na yalodra na tamata ki na cakava na ka ca.
12 E dina, sa caka ca tikoga na tamata ca, na nona veisiga sa vakabalavutaki tiko ga, ia au sa kila ga, na vinaka ena nodra o ira sa rerevaka na Kalou, ka sa rere tiko e matana.
13 Ena sega ni vinaka vei ira na tamata ca, se me vakabalavutaki tiko ga na nodra veisiga sa yaloyalo walega, ni sa sega vei ira na rerevaka na Kalou.
14 Sa dua na ka wale sa yaco tiko e vuravura, sa yaco tiko vua na tamata dodonu na ka sa dauyaco tiko vua na sega dodonu, na ka sa yaco vua na tamata sega yaga sa yaco talega vua na tamata dodonu, Au sa tukuna kina ni sa ka wale na ka kecega oqo.
15 Au sa laveta kina na marau, ni sa sega na ka e vinaka vua na tamata ena ruku ni matanisiga oqo, me kana ga ka gunu ka marau tiko, oqo ga, ena vo tiko vua ena vuku ni nona cakacaka sa solia vua na Kalou ena ruku ni matanisiga oqo.
16 Ni'u sa vakaraica ena yaloqu, me'u kila na yalomatua, me'u raica na cakacaka sa caka ena vuravura oqo, sa sega ni rawa na moce ena bogi se ena siga.
17 Au sa raica ga na cakacaka kece ni Kalou, ni sa sega ni rawa ni kila na tamata na cakacaka sa caka ena ruku ni matanisiga oqo. Kevaka sa vakasaqara na tamata me kunea, sa sega ni rawa; na tamata vuku sa saga me kunea, sa sega ni rawa.