Dauvunau

Chapter 3

Ki na veika kecega sa tu na kena gauna, Na gauna kei nai naki ena ruku i lomalagi:
2 Na gauna me sucu kina e dua, Na gauna me mate kina e dua; Na gauna ni teitei, Na gauna me tamusuki kina na ka sa tei;
3 Na gauna ni veivakamatei, Na gauna ni veivakabulai; Na gauna ni basubasu Na gauna ni tara cake;
4 Na gauna ni tagi, Na gauna ni dredre Na gauna ni tagi vakararawa Na gauna ni veimeketi;
5 Na gauna ni bini vatu, Na gauna ni tala vatu, Na gauna ni veimokoti Na gauna me oti kina na veimokoti;
6 Na gauna ni solia; Na gauna ni kumuna Na gauna ni maroroya, Na gauna ni kena kau tani na ka sa maroroi;
7 Na gauna ni dresudresu, Na gauna ni culacula; Na gauna ni veigaluvi Na gauna ni veivosaki;
8 Na gauna ni veilomani, Na gauna ni veicati; Na gauna ni valu, Na gauna ni sautu.
9 Na cava na kena yaga vua na tamata na ka sa dau cakacaka kina o koya?
10 Au sa raica oti na ka sa dausolia na Kalou me na vakacegui ira kina na luve ni tamata.
11 Na Kalou sa cakava vakarairaivinaka na ka kecega, ena kena gauna talega. Sa biuta na sega ni mudu ki na yalo ni tamata, sa sega kina na tamata sa raica rawa na ka sa cakava na Kalou mai na i vakatekivu ka yacova nai vakataotioti.
12 Au sa kila, ni sa sega tale na ka e vinaka cake ena kena oqo, o ya me reki tikoga na tamata ka caka vinaka ni se bula tiko,
13 Kei na tamata talega me gunu ka kana, ka rekitaka na vinaka ni nona cakacaka “ oqori sai solisoli ga ni Kalou.
14 Au sa kila ni veika kece e cakava na Kalou, sa talei ka sega ni mudu. Sa sega na ka me vakuri kina Sa sega talega na ka me kautani mai kina. Sa cakava kecega oqo, me rere tiko kina vei koya na tamata.
15 Na veika sa oti, kei na veika sa vo tu me vakaoti, Na Kalou sa vinakata me raica nai tukutuku ni veika sa caka oti. Sa Yaco Tikoga Na Veika Sa Sega Ni Dodonu Me Yaco
16 Au sa raica ena ruku i matanisiga oqo; Ena i tikotiko ni veilewai, sa tiko talega kina nai valavala e ca; Ena vanua ni cakacaka dodonu, sa tiko talega kina na cakacaka e ca.
17 Au sa tukuna ki na yaloqu, "Na Kalou ena lewai ira na dodonu kei ira na ca, ni sa na dua na gauna ni vei i naki kecega kei na vei cakacaka kecega."
18 Au sa tukuna ki na yaloqu, "Baleta na ka era sa taukena na luve ni tamata, sa vakatovolei ira na Kalou, me rawa ni ra raica, me ra kila talega, ni ra sa vaka ga na manumanu."
19 Na ka sa dau yaco vei ira na tamata, sa yaco talega vei ira na manumanu; sa mate e dua, sa mate talega o koya ka dua. E rau sa cegu ruarua. Sa sega kina ni uasivi na tamata mai na manumanu, sa ka wale na ka kecega.
20 E ra sa lako kecega kina dua na vanua: Era sa lako kecega mai na soso Era na lesu tale ki na soso.
21 O cei sa kila rawa na yalo ni luve ni tamata ni sa lako cake, kei na yalo ni manumanu ni sa lako sobu?
22 Au sa kila ni sa sega tale na ka e vinaka vua na tamata, me marautaka ga na nona cakacaka, oqori na nona i votavota. O cei ena rawata me kauti koya tale mai me mai raica na ka sa cakava oti?