Daniel

Chapter 2

Bak simalam, dua thon óh ka lheueh Raja Nebukadnezar geumat peurintah, gobnyan meulumpo. Lumpo geuhnyan keubit jipeususah that até geuh, sampoe gobnyan hana hase le geuéh.
2 Lé sabab nyan laju geutawök ureuëng peuramai, ahli meurajah, tabib dan ureuëng-ureuëng nyang na iéleumé, mangat jiboh makna lumpo geuhnyan nyan.
3 Watée awaknyan jidong dikeue gobnyan, raja laju geupeugah, "Ulôn meulumpo, dan até lôn susah that sabab meuhéuet that beulôn teupeue makna lumpo nyan!"
4 Awaknyan laju jijaweueb lam basa Aram, "Udeb kheueh Teungku Amphon siumu masa! Neupeugah kheueh lumpo nyan ubak kamoe, mangat jeuet kamoe peutrang makna lumpo nyan."
5 Geujaweueb lé Raja, "Ulôn ka lheueh ulôn cok keuputosan nyang lagée nyoe: Gata harôh tapeugah lumpo nyan ubak ulôn, meunan cit deungon makna jih. Meunyoe gata hana hase, gata teukoh-koh dan rumoh gata teureuloh.
6 Teuma meunyoe gata hase, ubak gata ulôn bri hadiah nyang ceudah-ceudah dan peunghoreumatan nyang raya. Nah, tapeugah kheueh laju lumpo ulôn nyan deungon makna jih!"
7 Jijaweueb lom lé awaknyan, "Teungku peugah dilée lumpo nyan ubak kamoe, óh lheuehnyan barô kheueh kamoe peutrang makna jih."
8 Ban geudeungoe nyang lagée nyan raja laju geujaweueb, "Paih that lagée nyang ulôn duga. Gata nyang na neu ulue-ulue watée mantong, sabab gata tateupeue bahwa
9 ulôn na meukeusut keuneuk lôn huköm gata banmandum deungon cara nyang saban meunyoe gata hana hase tapeutrang makna lumpo nyan ubak ulôn. Gata ka tameupakat mangat ulôn nyoe hana piôh-piôh gata peungéuet dan tapeumeuén ulôn deungon harapan bahwa ulôn ku ubah peue-peue nyang ka lôn peuputôh. Nah, tapeugah kheueh laju makna lumpo nyan, teuma ulôn kuteupeue bahwa gatapih hase tapeutrang makna lumpo nyan."
10 Banmandum ahli nujum nyan jijaweueb, "Bansigom donya nyoe hana nyang teupeue peue nyang Teungku Amphon lakée. Dan hántom na sidroe raja, padubna rayeuk dan mulia raja nyan, geulakée hai nyang lagée nyan ubak sidroe peuramai, nyang ahli meurajah, dan ureuëng-ureuëng meuiéleumé bak meuligoe gobnyan.
11 Teungku Amphon neulakée sapeue-sapeue nyang paleng payah. Hana meusidroe pi nyang hase jipeupeunoh teukeucuali lé dewa-dewa, teuma awaknyan hana tinggai lamkawan manusia."
12 Ban geudeungoe lagée nyan raja beungéh lumpah na dan laju geupeutron titah mangat teupoh maté bubena ureuëng-ureuëng carông nyang na di Babel.
13 Laju peurintah nyan geupeumaklum, dan banmandum ureuëng nyang malem dan nyang carông, hana tuwoe cit keu Nabi Daniel dan rakan-rakan gobnyan jikeuneuk poh maté.
14 Dan Daniel laju geujak meurumpok ubak Ariokh, peumimpén peungawai raja, nyang ka siab jilaksana huköman maté nyan. Deungon até-até that
15 Daniel laju geutanyong ubak ureuëng nyan, pakon raja ka geupeuteubiet peurintah nyang kreueh luwa biasa nyan. Ariokh laju jipeugah ubak Daniel peue nyang ka teujadi.
16 Deungon pantaih Daniel laju geujak meuhadab ubak raja dan geulakée beugeubri watée mangat jeuet geupeutrang makna lumpo nyan.
17 Nyang geulakée lé Daniel nyan geubri lé raja, laju Daniel geuwoe u rumoh dan geupeugah laju hainyan ubak Hananya, Misael dan Azarya.
18 Geuyue laju ubak awaknyan mangat geumeudoá ubak Po teu Allah di syeuruga jeuet Po teu Allah beuna gaséh sayang ubak awaknyan dan geutem peuleumah makna lumpo nyan. Deungon lagée nyan awaknyan hana teuhuköm maté meusajan ngon ureuëng-ureuëng patot nyang laén.
19 Malamnyan cit teuma Po teu Allah geupeuleumah makna lumpo nyan ubak Daniel nibak saboh keumalon. Dan Daniel laju geupujoe Po teu Allah di syeuruga,
20 kheun gobnyan, "Allah nyan bijaksana dan peukasa, teupujo kheueh Gobnyan siumu masa!
21 Gobnyan kheueh nyang peuteutab musém dan masa, dan nyang peu rhot ngon nyang angkat peunguasa. Gobnyan kheueh nyang bri keubijaksanaan, dan nyang anugeurah peungeurtian.
22 Gobnyan kheueh nyang peugah rahsia nyang paleng lhok dan Gobnyan geuteupeue peue mantong nyang teujadi didalam seupôt. Gobnyan peunoh ngon cahya trang.
23 Ya Allah, nyang geupujoe lé indatu lôn, Droeneueh lôn pujoe dan lôn peumulia. Sabab neubri ubak ulôn hikeumat dan teunaga. Peue nyang kamoe lakée ka Droeneueh peupeunoh. Dan jeunaweueb ubak raja ka Droeneueh tunyok."
24 Óh lheuehnyan Daniel laju geujak ubak Ariokh nyang ka geubri tugaih keu jipoh maté bandum ureuëng-ureuëng patot nyang na di Babel. Geupeugah lé Daniel ubak Ariokh nyan, "Bék tapeumaté bandum ureuëng-ureuëng patot nyan. Taba kheueh ulôn jak meuhadab ubak raja, sabab ulôn keuneuk jak peugah ubak Po raja makna lumpo nyan."
25 Deungon pantaih that Ariokh laju jiba Daniel meuhadab ukeue Raja Nebukadnezar sira jipeugah, "Ulôn ka meuteumé lamkawan ureuëng-ureuëng Yahudi nyang teuböih sidroe ureuëng nyang hase geuteupeue makna lumpo Teungku Amphon."
26 Dan geupeugah kheueh lé raja ubak Daniel nyang geuhôi cit deungon nan Beltsazar, "Peu kheueh hase tapeutrang lumpo ulôn dan maknajih?"
27 Geujaweueb lé Daniel, "Hana ureuëng meuiéleumé, ahli meurajah, ahli meuramai dan ahli keu soai bintang-bintang nyang hase jipeugah hainyan ubak Teungku Amphon.
28 Teuma di syeuruga na Po teu Allah nyang peugah banmandum rahsia, dan Gobnyan ka geubri tée ubak Teungku Amphon peue nyang teujadi óh uroe dudoe. Bak saát nyoe, neupeu idhin kheueh ubak ulôn jeuet lôn peutrang makna lumpo dan nyang deuh lôn kalon nyang Teungku Amphon teurimong watée neuéh nyan.
29 Watée Teungku Amphon teungoh neuéh, Teungku Amphon meulumpo keuhai jamén nyang teuma teuka. Allah nyang singkab bandum rahsia geupeuleumah ubak Teungku Amphon peue nyang teujadi.
30 Rahsia nyoe ka geupeugah ubak ulôn bukon ulôn nyoe leubeh carông nibak soemantong, teuma mangat Teungku Amphon jeuet neuteupeue makna lumpo Teungku Amphon dan neumuphom teuma keuhai asoe até Teungku Amphon keudroe.
31 Nyoe kheueh keumalon nyang Teungku Amphon ngieng: Dikeue Teungku Amphon na saboh patong! Patong nyan lumpah raya, dan meukilat-kilat teuma ruman jih lumpah that teumakot.
32 Ulée jih teupeugét nibak méuh aseuli, dada dan jaroe jih nibak pirak, keuieng dan boh punggong jih nibak teumaga,
33 pha jih nibak beuso dan gaki jih siladum nibak beuso dan siladum teuk nibak tanoh kliet.
34 Watée Teungku Amphon teungoh neupandang ateueh nyan, na sianeuk batée raya leukang bak binéh reuleung, batée nyan leukang hana soe nyang cukéh, dan batée nyan rhot laju jitimpok ateueh gaki patong nyan nyang teupeugét nibak beuso dan tanoh kliet nyan, sampoe reumok.
35 Bak watée nyan cit teuma bandum patong nyan reuloh dan jeuet keusinamon beuso, tanoh kliet, teumaga, pirak, dan méuh nyang hanco meurabok lagée abée bak teumpat teupéh aneuk gandom watée musém uroe kha. Seunamon nyan habéh jipupoe jipot lé angén, sampoe hana tinggai beukaih mubacutpi. Teuma batée nyang peureubah patong nyan ka rayeuk na bube gunong sampoe ka peunoh bansigom bumoe.
36 Nyan kheueh lumpo Teungku Amphon, dan bak saátnyoe lôn peutrang teuma makna jih.
37 Nyang Mulia Teungku Amphon na kheueh raja sigala raja; Teungku Amphon kheueh nyang paleng meukuasa. Po teu Allah di syeuruga ka geubri ubak Teungku Amphon keurajeuen nyoe, keukuasaan, teunaga dan keuagongan.
38 Teungku Amphon geupeujeuet keupeunguasa ateueh bagian donya nyang na peunduduek dan ateueh meubagoe cicém dan beulatang nyang laén. Teungku Amphon keudroe na kheueh ulée méuh nibak patong nyan.
39 Teuma óh ka lheueh keurajeuen Teungku Amphon trok bak akhé masa, teuma teuka keurajeuen laén nyang hana saban rayeuk jih lagée keurajeuen Teungku Amphon. Óh lheuehnyan teuka kheueh keurajeuen nyang keu lhée nyang teulambang ubak bagian nibak teumaga keu patong nyan, nyang kuasa bansigom donya.
40 Seulanjut jih teuma teuka keurajeuen nyang keu peuet, nyang teuga jih lagée teunaga beuso. Dan lagée beuso nyang teupeureumok dan teupeuhanco peue-peue nyang na, meunan kheueh teuma keurajeuen nyang keu peuet nyoe teupeureumok dan teupeuhanco keurajeuen-keurajeuen nyang laén.
41 Gaki dan jaroe-jaroe patong nyang teupeugot siladum nibak tanoh kliet dan siladum teuk nibak beuso nyan, nyan na kheueh sibagoe peutunyok bahwa bak saboh saát teuma keurajeuen nyan teuma teubagi-bagi. Keurajeuen nyan na cit teunaga jih sabab tanoh kliet nyan na meujampu deungon beuso.
42 Jaroe-jaroe gaki nyang siladum teupeugot nibak beuso dan siladum nibak tanoh kliet nyan makna jih bahwa na bagian keurajeuen nyang teuga dan na cit nyang leumoh.
43 Beuso meujampu ngon tanoh kliet nyan, nyan makna jih bahwa keurajeuen nyan jiuseuha jipeukong droe deungon cara jipeuna meukawen meujampu, teuma useuha nyang lagée nyan sia-sia, lagée beuso nyang hana hase meusinyawöng deungon tanoh kliet.
44 Bak masa peurintah raja-raja nyan, Po teu Allah nyang na di syeuruga geupeudong saboh keurajeuen nyang meuteun siumu masa dan nyang hana hase jipeutaloe lé bansa toh mantong. Keurajeuen nyan geupeuhanco sampoe meurabok bubena keurajeuen nyang laén.
45 Bukon kheueh ka neukalon lé Teungku Amphon bahwa deungon hana jimat lé manusia pih, si aneuk batée lheueh nibak reuleung laju rhot dan keunong dan reumok ateueh patong nibak beuso, teumaga, tanoh kliet, pirak dan méuh nyan? Po teu Allah nyang akbar geupeugah ubak Teungku Amphon peue nyang singoh teujadi. Lumpo nyan jeuet teupeucaya dan peue-peue nyang ka lôn peutrang nyoe na kheueh teupat."
46 Laju geusujut kheueh Raja Nebukadnezar dikeue Daniel dan geubri peurintah mangat Daniel jihoreumat dan ubak gobnyan teupeuseumah keureubeuen nyang teutot dan peuseumahan-peuseumahan nyang laén.
47 Geupeugah lé Raja, "Beutôi, Daniel, Allah gata paleng rayeuk lamkawan Allah nyang laén. Gobnyan na kheueh nyang mat kuasa ateueh banmandum raja, dan nyang peutrang bubena rahsia. Ulôn kuteupeue hainyan sabab gata ka hase tapeutrang makna lumpo ulôn nyoe."
48 Óh lheuehnyan Daniel geubri keududuekan nyang manyang, geuanugeurah hadiah nyang jai dan nyang ceudah ngon lagak-lagak, dan laju geuangkat jeuet keugubunur Babel, dan geupeujeuet teuma keupeumimpén nyang manyang ateueh bandum peunaseuhat meuligoe.
49 Teuma ateueh geulakée lé Nabi Daniel, raja laju geuseurah peumeurintahan propinsi Babel nyan ubak Sadrakh, Mesakh dan Abednego, seudangkan Daniel keudroe tinggai lam meuligoe raja.