Wisdom

dan laju geupeurintah lagée nyoe ubak hakém-hakém nyan, "Tameubuet kheueh nyang ade ngon bijaksana, sabab gata tameuhakém nyan bukon ateueh nan manusia, teuma ateueh nan TUHAN. Gobnyan geukawai gata watée gata tapeuputôh peukara.
2 Tawarikh 19:6
Teuma sabab lé gaséh TUHAN nyang rayeuk, ulôn hase lôn tamong u dalam Baét Droeneueh. Ulôn sujut u arah Baét Droeneueh nyang suci, dan ulôn seumah Droeneueh deungon khidmat.
Zabur 5:8
Neutunyok kheueh keuheundak Droeneueh keu ulôn, ya TUHAN, neupeugah kheueh peue nyang harôh ulôn peubuet. 5 Neupeurunoe kheueh dan neubimbéng kheueh ulôn mangat udeb lôn nyoe sisuai deungon keuheundak Droeneueh, sabab Droeneueh kheueh Allah nyang peuseulamat ulôn, nyang jeueb-jeueb watée ulôn meuharab ubak Droeneueh.
Zabur 25:4,5
TUHAN geubimbéng ureuëng nyang miyueb até, dan geupeurunoe awaknyan keuheundak Gobnyan.
Zabur 25:9
Neutunyok kheueh bak ulôn keuheundak Droeneueh, ya TUHAN, neubimbéng kheueh ulôn bak jalan nyang beuna, sabab musoh ulôn le lumpah na.
Zabur 27:11
TUHAN meufeureuman, "Ulôn teuma Lôn tunyok rot nyang harôh gata jak, gata Lôn bimbeng dan Lôn bri naseuhat.
Zabur 32:8
TUHAN geubimbéng ureuëng nibak rot nyang harôh geulalu, Gobnyan geupeukong ureuëng nyang udeb jih teutab meukeunong bak até Gobnyan.
Zabur 37:23
Neubimbéng ulôn deungon naseuhat, dan neuteurimong ulôn deungon keuhoreumatan bak laén watée.
Zabur 73:24
Neupeubleut kheueh mata kamoe jeuet hase kamoe keumalon ajaran nyang lumpah hebat dalam huköm Droeneueh.
Zabur 119:18
Sabda Droeneueh na kheueh panyöt tanglong keu tieb-tieb langkah lôn, cahya nyang trang nibak jalan lôn.
Zabur 119:105
Meunyoe teupeutrang, ajaran Droeneueh teubri trang nyang luwa biasa, dan teubri peungeurtian keu ureuëng seudeurhana.
Zabur 119:130
Tieb-tieb beungoh neupeu ingat kheueh ulôn keu geunaséh Droeneueh, sabab ubak Droeneueh kheueh ulôn meuharab. Neutunyok kheueh bak ulôn rot nyang ulôn jak, sabab ubak Droeneueh kheueh ulôn meudoá.
Zabur 143:8
Neupeurunoe kheueh ulôn jeuet lôn peubuet meulakée Droeneueh, sabab Droeneueh kheueh Allah ulôn. Droeneueh gét that até, ya TUHAN, dan neubimbéng ulôn bak rot nyang rata. Peuseulamat kheueh ulôn nyang sisuai deungon janji Droeneueh, ya TUHAN, deumi keuget Droeneueh, neupeulheueh kheueh ulôn nibak meularat.
Zabur 143:10, 11
Deungon na peutuah-peutuah nyoe di ureuëng bijaksana pi meutamah peungeutahuan gobnyan, dan ureuëng nyang ka meupeundidekan teuma meuteumé bimbéngan.
Amsal 1:5
Nyoe, aneuëk ulôn, useuha kheueh mangat na pikeran nyang tajam dan talakée kheueh peungeurtian. Deungon na lagée nyan gata teuma tateupeue peue areuti jih teumakot ubak TUHAN dan gata teuma meuteumé peungeutahuan keuhai Po teu Allah. TUHAN kheueh nyang bri hikeumat; nibak Gobnyan kheueh manusia meuteumé peungeutahuan dan peungeurtian.
Amsal 2:3, 5, 6
Peucaya kheueh ubak TUHAN deungon sipeunoh até gata, dan bék kheueh gata peubangga peungeurtian gata keudroe. Ingat kheueh ubak TUHAN ateueh peue mantong nyang gata peubuet, dan Gobnyan teuma geutunyok keu gata keuhai udeb nyang leubeh sampoereuna.
Amsal 3:5,6
Ajaran-ajaran gobnyan teubimbéng gata nibak rot ueh raya, nyang jaga gata óh watée malam, dan nyang bri peutunyok nibak gata óh watée gata tabeudôh.
Amsal 6:22
Ureuëng bangai meurasa droe jih hántom na salah, teuma ureuëng bijaksana jitem deungoe naseuhat.
Amsal 12:15
Manusia jeuet jipeugöt reuncana, teuma Po teu Allah nyang bri keuputosan.
Amsal 16:1
Meunyoe gata galak meurunoe dan tadeungoe naseuhat, singoh gata jeuet keu ureuëng nyang meuhikeumat.
Amsal 19:20
Reuncana meuhase deungon na peutimbangan; lé sababnyan, bék kheueh meujuang deungon hana reuncana nyang masak.
Amsal 20:18
Sabab sigohlom teujak muprang harôh na reuncana nyang matang leubeh ilée, dan seumaken le naseuhat, seumaken raya keumungkenan keu meunang.
Amsal 24:6
Keuadelan hana jipaham lé ureuëng doraka, teuma ureuëng nyang seumah TUHAN muphom that-that keuhai nyan.
Amsal 28:5
Kuasa TUHAN geubimbéng gobnyan, geupeujeuet gobnyan meubudho dan bijaksana, áref bak geucok keuputosan dan geulaksana; geuteupeue ubak keuheundak Po teu Allah dan taqwa ubak Gobnyan. Keusukaan gobnyan na kheueh taát ubak TUHAN. Gobnyan hana geupeusidang gob lagée teungieng sikeujab atawa dasai nibak nariet gob peusampoe.
Nabi Yesaya 11:2, 3
Bansa Ulôn nyang buta Lôn bimbeng meulalu rot nyang hana awaknyan teupeue; awaknyan teuma Lôn tunton bak jalan-jalan nyang hana awaknyan turi. Seupôt buta Lôn peujeuet trang keu awaknyan, dan jalan nyang keuwieng keuwot Lôn peurata. Nyan kheueh nyang Lôn peubuet keu awaknyan, dan nyan pasti Lôn laksana.
Nabi Yesaya 42:16
TUHAN Nyang Mahamanyang geupeurunoe ulôn peugah haba, mangat tutoe ulôn jeuet teupeukhong ureuëng nyang laéueh. Tieb-tieb beungoh Gobnyan geupeubeudôh hasrat ulôn mangat lôn deungoe ajaran Gobnyan keu ulôn.
Nabi Yesaya 50:4
Ulôn sabe Lôn bimbeng gata dan Lôn peutroe gata bak tanoh nyang tho kreng; Ulôn teutab Lôn peulara gata mangat teutab seuhat dan teuga. Gata teuma jeuet lagée seunaman nyang seb ié jih, lagée mata ié nyang hántom na tho-tho.
Nabi Yesaya 58:11
TUHAN, lôn kuteupeue hana meusidroe pih nyang meukuasa jipeuteuntée nasib jih atawa jikeundali jalan udeb jih.
Nabi Yeremia 10:23
Awaknyan jijak sira ié mata jirô nyang hana putôh-putôh, Ulôn hibor dan Lôn bimbeng awaknyan. Ulôn ba awaknyan meulalu rot nyang le ié ile, rot nyang rata mangat awaknyan hana meugantoh. Bak ureuëng Israel, Ulôn nyoe lagée ureuëng syiek jih; Efraim na kheueh aneuëk agam Lôn nyang tuha."
Nabi Yeremia 31:9
Po teu Allah geujok ubak ban peuet droe peumuda nyan hikeumat keu ahlian lam hai keususasteraan dan iéleumé. Seulaén nibaknyan ubak Daniel geubri teuma keu ahlian mangat jeuet geupeutrang keuhai keumalon dan makna lumpo.
Daniel 1:17
Bék gata peuhakém ureuëng ngon dasai jih nyang deuh teukalon, teuma ngon dasai keuadelan."
Yahya 7:24
Nyoe na kheueh nyang keu lhée goe jih ulôn teuka jaksaweue gata. Lam Alkitab na teutuléh lagée nyoe, "Tieb-tieb peukara meuseuti jibantu lé keusaksian dua atawa lhée droe saksi, barô kheueh peukara nyan sah."
2 Korintus 13:1
Meunyoe na sidroe lamkawan gata nyang hana bijaksana, bah kheueh jihnyan jilakée ubak Allah, ngon lagée nyan Allah teuma geubri keubijaksanaan nyan bak jih; sabab keu tieb-tieb ureuëng, Allah geubri ngon murah até dan ngon peurasaan gaséh sayang.
Yakobus 1:5
Teuma ureuëng nyang na keubijaksanaan nyang asai jih di ateueh, jihnyan kheueh nyang phon-phon that gleh, óh lheueh nyan jitem meudamé, ramah dan patuh. Nibak jihnyan peunoh gaséh sayang dan jipeuhase buet-buet nyang gét. Jihnyan hana meupihak dan hana meupura-pura.
Yakobus 3:17