Sakaraia

Chapter 8

Sa yaco tale mai na vosa i Jiova ka vaka,
2 "Sa tukuna vaka oqo o Jiova ni lewe vuqa, 'Au sa loma katakata vakalevu ena vuku i Saioni, ena gagadre titobu, Au sa loma katakata e na vukuna.'
3 "Sa vosa kina o Jiova ka vaka: 'Au na lesu tale ki Saioni, ka tiko sara ga ena loma i Jerusalemi. O Jerusalemi ena vakatokai me Koro ni Dina, na Ulunivanua i Jiova ni lewe vuqa, na Ulunivanua Tabu.'
4 "Sa tukuna vaka oqo o Jiova ni lewe vuqa, 'O ira na turaga kei ira na marama e ra na dabe tale, ena veisalatu e Jerusalemi, Era na yadua nai titoko e ligadra ni sa levu mai na veiyabaki.
5 Na veisala e na koro era na sinai ena gone lalai, ni ra sa qito voli ena veisala.'
6 "Sa tukuna o Jiova ni lewevuqa; 'Kevaka sa vinaka ki na matadra o ira sa vo ena siga oqo, ena vinaka beka, talega ki na mataqu?' Sa vosa vaka oqo o Jiova ni lewevuqa.
7 "Sa tukuna o Jiova ni lewevuqa; 'Io, Au na vakabulai ira na Noqu tamata mai na tokalau, mai na ra talega;
8 Au na kauti ira lesu mai, era na mai tiko e loma i Jerusalemi. Era na Noqu tamata, Au na nodra Kalou ena dina kei na yalododonu.'
9 "Sa tukuna vaka oqo o Jiova ni lewevuqa; 'Me kaukauwa tiko na ligamudou, Oi kemudou sa vakarorogo tiko ena siga oqo, na vosa sa lako mai ena gusu ni parofita, o ira sa tiko ena siga sa yavutaki kina na vale i Jiova ni lewe vuqa, me sa tara kina na vale.
10 Ni se bera na veisiga oqo, era sa sega tu ni saumi na tamata cakacaka, sa sega talega ni saumi na manumanu ka cakacaka; sa sega talega na vakacegu vei ira na meca sa lako yani se lako mai; Ni'u sa biuta ki na tamata kecega me veimecaki kei na kai nona.
11 'Ia, oqo, Au na sega ni cakava vaka oqo, vei ira sa vo mai vei ira na Juta me vaka e liu,' sa tukuna o Jiova ni lewe vuqa.
12 'Ena vuavuai mai na sila, na vaini ena solia mai na vuana na qele ena solia mai na ka sa levu, o lomalagi ena vakalutuma mai na teguOAu sa lewa me ra na taukena na i vovo ni bula vei ira na Juta na vei ka kece oqo.
13 E na yaco mai na veika oqo, me vaka ni dou a vakaloucataki ena kedra maliwa na veimatanitu, na vale i Juta kei na vale i Isireli, Au na vakabulai kemudou, dou na vakalouvinakataki. Dou kua ni rere, dou vakaukauwataka ga na ligamudou.'
14 "Sa cavuta oqo o Jiova ni lewevuqa, 'Ni'u sa nakita me'u totogitaki kemudou, Ni ra a vakacudrui Au na nomudou qase me'u rarawa kina, ' sa tukuna o Jiova ni lewe vuqa. 'Au na sega ni veisautaka na dina o ya,
15 Oqo talega ena siga e dai, Au sa nakita me'u caka vinaka vei Jerusalemi, ki vei Juta talega. Dou kua ni rere.
16 Oqo na ka mo dou cakava, me vosa dina tiko na tamata vua na wekana, dou solia na lewa ena nomudou matamata, me dina, me dodonu, me veivakacegui.
17 Me kua ni dua e vakanananucataka na kai nona e yalona; kua ni lomana na bubului vakailasu. Na veika kece oqori, Au sa cata,' sa tukuna o Jiova ni lewe vuqa."
18 Sa yaco tale mai vei au na vosa i Jiova ni lewe vuqa ka vaka,
19 "Oqo na vosa i Jiova ni lewevuqa: 'Na lolo ni ka va ni vula Na lolo ni ka lima ni vula Na lolo ni ka vitu ni vula Na lolo ni ka tini ni vula, Ena ka ni reki ka marautaki, o sa kana magiti e taleitaki vei ira na Juta. Mo dou lomana na dina kei na vakacegu.'
20 "Sa tukuna o Jiova ni lewevuqa, 'Na tamata era na lako mai, nai taukei mai na veikoro levu;
21 O ira nai taukei ni dua na koro, era na lako ki na dua tale na koro, ka tukuna tiko, "Me da lako cake ka masu vei Jiova, e matana, me da vakasaqarai Koya, oi au talega, au na lako cake."
22 Io, sa levu na tamata kei ira na veimatanitu kaukauwa, era na lako mai ka vakasaqara na Kalou e Jerusalemi ka masu vua na Kalou o Jiova.'
23 "Ena siga o ya, 'Era na lewe tini na tamata mai na duivosavosa kecega e vuravura era na mai taura na liga ni nona sote e dua na Jiu ka vaka, "Me keitou lako vata kei iko, ni keimami sa rogoca ni sa tiko vata kei kemuni na Kalou."'"