Opetaia

Chapter 1

A raivotu i Opetaia. Sa tukuna vaka oqo na Kalou o Jiova me baleti Itomi (keimami sa rogoca e dua na i tukutuku, sa tukuna, "dou tucake, meda valuti koya ena veivaluvaluti"):
2 "Raica, au na vakalailaitaki iko ena kedra maliwa na veimatanitu; o na beci vakalevu.
3 Na viavialevu ni yalomu sa vakacalai iko tale, o iko ka dau tiko ena qara ni ulunivanua, ka sa cecere na nomu i tikotiko; o sa tukuna e yalomu, 'O cei me kauti au sobu kina qele?'
4 E dina o toka sara ki cake me vaka na ikeli, o vakadabera nomu sova ena kedra maliwa na vei kalokalo, mai keri au na kolotaki iko sobu i ra", sa tukuna o Jiova.
5 "Kevaka era lakovi iko mai na daubutako, kei ira na dauvakasaurara ena bogi”isa na nomu na vakalolomataki!” Era na butako tiko li me yaco ni sa cegu na lomadra? Kevaka era lako mai vei iko na dau veti vaini, era na sega li ni vakavoca eso na vua ni vaini?
6 "E rawa vakacava me kunei o Iso! Ena rawa li me laurai na nona i yau talei!
7 O ira kece nomu lewe ni matanitu era na kauti iko vakaukauwa kina i yalayala ni vanua; o ira na tamata o ni dau veiyaloni era na vakaisini iko ka vakasaurarataki iko. O ira o ni dau kakana vata era na bukia tale na kemu vere. Ka sega ni bau dua vei kemuni me kila rawa.
8 "Me'u na sega li ni vakarusai ira na tamata vuku mai Itomi, kei na nodra kila ka ena ulunivanua i Iso?' sa tukuna o Jiova?
9 Oi kemudou na tamata qaqa e Emani, dou na taqaya, ni sa yaco na tamata kecega ena ulunivanua i Iso, era na musuki laivi ena veivakamatei.
10 "Oi valavala vakaukauwa vua na tacimu o Jekope, ena yacovi iko kina na madua, o na vaqeavutaki vakadua mai vuravura.
11 Ena siga o vakatikitiki taki iko tani mai kina” mo qai sarava tiko mai na nodra kau vakabobula na nona mataivalu, o ira na veimataivalu era curumi Jerusalemi”o iko o sa qai tu me vaka o wili vata kei ira.
12 "Ia o iko mo kakua ni vakaraica ka vakadodorairaitaka tiko mai na siga i tacimu ena nona a kau vakabobulataki; o qai mamarau ena nodra sa ravuti tiko na gone i Juta ena nodra siga ni vakararawataki; o qai vosa vakadokadoka tu ena siga ni nodra kune ka rarawa.
13 Mo kakua ni curuma na nodra matamata ni koro na noqu tamata ena siga era rarawa kina; mo kakua ni vakaraica na nodra rarawa ena siga era leqa kina, mo kakua ni kocova na nodra i yau ena siga era vakararawataki kina.
14 Mo kua ni tu ena basoga ni sala; mo qai vakamatei ira na dro yani; mo kua talega ni soli ira mera vesuki ena gauna era vakacacani tiko kina.
15 "Ni sa toro voleka na siga i Jiova kina veimatanitu; na ka o vakayacora ena vakayacori lesu tale vei iko; ena saumi lesu me tara na nomu ka vakamareqeti.
16 Me vaka na nomu gunu tiko mai ena Noqu ulunivanua tabu, era na gunuva talega na veimatanitu; io era na gunuva ka gunuva era na qai duatani mai ka sega ni vaka e liu.
17 "Ia ena ulunivanua o Saioni ena yaco kina na veisereki, kei na veivakasavasavataki; na mataqali i Jekope era na taura lesu tale na nodra vanua.
18 Na mataqali i Jekope ena vaka na bukawaqa, kei na mataqali i Joseva ena vaka na yameyame; ia na mataqali i Iso ena vaka na qa ni sila; era na vakawaqa ni buka me caudre vinaka na kena yameyame, ena sega ni vo e dua era na dravusa taucoko sa tukuna o Jiova.
19 O ira mai na ceva era na tawana na ulunivanua i Iso, na vanua lolovira era na tawana na kai Filisitia. Era na taura na qele i Ifereimi, kei na qele o Samaria o Penijamini ena taukeni Kiliati “ talega o koya.
20 O ira na gone i Isireli ka ra kau vakabobula, era na taukena na vanua o Kenani ka yacovi Sarifaci. Na kai Jerusalemi era bobula ka ra tiko mai Sifarati era na taukena na koro levu ka tiko mai ena Ceva.
21 Era na butuka mai na ulunivanua o Saioni o ira ka kauta lako mai na veivakabulai, me ra mai lewa na ulunivanua o Iso, o Jiova ena liutaka na matanitu.