Tagi

Chapter 3

Sai au na tamata sa raica na veivakararawataki sa vakayacora na Kalou ena nona i titoko ni rarawa katakata.
2 Sa liutaki au o koya ka sa cakava me'u lako ena butobuto ka sega ena rarama.
3 Io, na ligana sa veicoqacoqa tale kei au ena veigauna kecega ena siga taucoko.
4 Sa qase mai na yagoqu, na kuliqu talega, sa musuka na suiqu.
5 Sa tagavi au me vesuki au, ka sa vakavoliti au ena veivakaisini kei na ca.
6 Sa biuti au o Koya ena vanua butobuto me vaka e dua sa mate makawa tu.
7 Sa sogoti au o Koya me'u kua ni dro bula: sa cakava o koya me vakabibitaki na kequ i vesu.
8 Ni'u sa tagi mada ga ka kaila, sa sogota o Jiova na noqu masu.
9 Sa sogota na noqu sala ena vatu; sa vakavevea na noqu i lakolako.
10 Sa cakava me'u vaka e dua na manumanu kila sa davo tiko me waraka na kena, Sa vaka na laioni sa toka vakarau.
11 Sa vukica tani o Koya na noqu sala, ka sa basubasuki au vakalalai.
12 Sa loveca na nona dakai, ka sa dodoka na nona gasau me vakadodonu mai vei au.
13 Sa vakayacora me lako mai vakadodonu na nona gasau titi me basuka na ketequ.
14 Au sa yaco me nodra i vakalasa na tamata” me'u nodra sere ni veivakalialiai ena siga taucoko.
15 Sa vakasinaiti au ena yaloca, sa vakagunuvi au ena kau wiwi.
16 Sa vakaramusutaka na batiqu ena vatu ka sa buluti au ena dravusa.
17 Sa vakayawataka na yaloqu mai na vakacegu, au sa sega ni nanuma kina na vinaka ni siga ni mataka.
18 Au sa tukuna kina, "na noqu kaukauwa kei na noqu vakanuinui sa vakayali mai vua na Kalou."
19 Mo ni nanuma na noqu vakararawataki ena noqu veilakoyaki tiko kei na kau wiwi e tubu cala.
20 Na yaloqu e se nanuma tikoga ka sa luvu talega e lomaqu.
21 Au sa qai nanuma tale oqo, ka au sa kila ni se tiko vei au na vakanuinui.
22 E na vuku ni loloma vakavuqa ni Kalou, eda sa sega kina ni vakaoti Ni sa sega ni mudu na nona loloma.
23 Era sa vou tiko ga ena veimataka; Sa rui levu ka cecere na Nomuni yalodina.
24 "Sa noqu i votavota o Jiova sa tukuna na yaloqu," O koya oqo au sa nuitaki koya kina!"
25 Sa vinaka na Kalou vei ira sa waraki koya, Ki na yalo ga sa vakasaqarai koya.
26 Sa vinaka vua na tamata me waraka tikoga vakamalua na veivakabulai i Jiova.
27 Sa vinaka vua na tamata me colata nai vua ni se cauravou tiko.
28 Me tiko duadua ka tiko vakamalua, ni sa vakatikora oti vua o Jiova;
29 Me biuta na gusuna kina kuvu ni soso”me dua beka kina nai nuinui.
30 Me solia na baluna ka dua vua sa sabici koya, ni sa sinai ena sega ni veiciqomi.
31 O Jiova ena sega ni biuta vakadua sara,
32 E dina ni sa vakaraitaka na rarawa, ia ena vakaraitaka tale na loloma me vaka na kena sa rui levu na nona yalololoma.
33 Sa sega ni dau veivakamavoataki vakailoa o koya, se dauveivakayalobibitaki vei ira na luve ni tamata.
34 Me butu qaqi ira ena ruku ni yavana, o ira kece na kaivesu e vuravura,
35 Me vukica tani na lewa dodonu me nodra na tamata, ena matai koya sa cecere sara,
36 Me vakagolea tani na tamata mai na nona i lakolako”sa sega ni vakadonuya o Jiova.
37 O cei oqo sa vosa tiko ka sa yaco, ni se bera ni vakatara me yaco o Jiova?
38 Sa sega beka ni lako mai na gusu i Jiova na ca kei na vinaka talega?
39 Ena cava era sa dau vakaulubale kina na tamata bula, Na tamata sa totogi ga me baleta na nona i valavala ca?
40 Me da lako mada ka vakaraica tale na noda i lakolako, ka me da lesu tale vua na Kalou;
41 Me da laveta cake na ligada kei na yaloda vua na Kalou sa tiko mai lomalagi.
42 Keimami sa talaidredre ka lako tani; o na sega ni vosota.
43 O ni sa ubi Kemuni ena cudru ka vakasaqarai keimami; O ni sa veivakamatei ka sega ni loloma.
44 O ni sa ubi Kemuni ena o, me kua kina ni lako vei kemuni na masu.
45 O ni sa cakava me keimami sa dukalevu kai benubenu e matadra na tamata.
46 Era sa dolava na gusudra vei keimami na meca.
47 Na rere, na veicoriti, na veivakacacani kei na veivakarusai sa lako mai vei Kemuni.
48 Sa drodro vakalevu na wai ni mataqu, me baleta na nodra sa vakarusai tiko na goneyalewa ni noqu tamata.
49 Sa drodro tu ga na wai ni mataqu, sa sega ni muduki rawa,
50 Me yacova sara ni sa rai sobu mai na Kalou me kila.
51 Na wai ni mataqu sa vakaleqa vakalevu na yaloqu me baleti ira na goneyalewa ni noqu koro.
52 O ira na meca era sa vakasasataki au me vaka e dua na manumanu vuka ni sa sega na vuna.
53 Era sa vakagalui au tiko ena loma ni qara, ka vakaviriki au ena vatu.
54 Sa vakadrodroi mai uluqu na wai, au sa tukuna kina "ni'u sa oti vakadua!"
55 I Jiova, au sa kaciva yani na Yacamuni, mai na boto ni qara.
56 O ni sa rogoca na domoqu, "mo ni kua ni vakadidi vara ki na noqu tagi, na noqu tagica na veivuke."
57 O ni sa voleka sara ena noqu tagi yani, o ni a tukuna kina, "me'u kua ni rere!"
58 I Jiova, o ni sa cakacaka vakaukauwa ena vuku ni yaloqu; o ni sa kauta lesu tale mai vei au na bula.
59 I Jiova, o ni sa kila se'u a leqa vakacava; mo ni raica ka lewa ga.
60 O ni sa raica kece na nodra yaloca, Na nodra nakinaki me baleti au.
61 I Jiova, o ni sa rogoca na nodra veivakacacani na ka kece era tuvana me baleti au,
62 Na tebenigusudra na meca, kei na nodra vakasolokakana ena vukuqu ena siga taucoko.
63 Mo ni raica ga na nodra dabe kei na nodra tucake; era sa seretaki au ena nodra sere ni veivakacudrui.
64 I Jiova, Mo ni sauma lesu vei ira me vaka na cakacaka ni ligadra.
65 Mo ni solia vei ira na yalo sa ubi tu. Na Nomuni veivakaloucataki me sa tu vei ira!
66 E na Nomuni cudru, me sa cici muri ira, ka vakarusai ira, ena ruku i lomalagi i Jiova.