Yahya

1 2 3 4 5 6 7 8 9 10 11 12 13 14 15 16 17 18 19 20 21

Chapter 3

Na sidroe tukoh agama lamkawan ureuëng Farisi nyang nan geuh Nikodemus.
2 Bak simalam Nikodemus nyan geujak bak Isa sira geupeugah lagéenyoe, "Bapak Gurée, kamoe teupeu Droeneueh geu utus lé Po teu Allah. Sabab hana meusidroe pih nyang hase jipeubuet buet lagée nyang Bapak peugét, meunyoe bukon Po teu Allah hana meusajan gobnyan."
3 Geupeugah lé Isa, "Peucaya kheueh, hana meusidroe pih nyang jeuet keu anggota umat Allah, meunyoe jihnyan hana teupeulahé lom teuma."
4 "Panena mungken ureuëng rayeuk teupeulahé lom teuma," kheun Nikodemus bak Isa, "Peu kheueh mungken ureuëng nyan jitamong lom lam pruet ma jih óh lheueh nyan teupeulahé lom?"
5 Geujaweueb lé Isa, "Keubiet beutôi haba ulôn nyoe: Meunyoe manusia hana teupeulahé nibak ié dan nibak Roh Allah, ureuëng nyan hana hase jeuet keu anggota umat Po teu Allah.
6 Manusia seucara jasmani geupeu lahé lé ureuëng tuha, teuma seucara rohani geupeu lahé lé Roh Allah.
7 Bék hireuen meunyoe ulôn peugah: Gata banmandum harôh teupeulahé lom teuma.
8 Angén jipot ho nyang jigalak; geutanyoe tadeungoe su angén nyan, teuma hana tateupeue rot pat jiteuka dan ho jijak. Meunan cit teuma ngon ureuëng nyang geupeu lahé lé Roh Allah."
9 "Pakriban hainyan hase teujadi?" geutanyong lé Nikodemus.
10 Geujaweueb lé Isa, "Gata gurée di Israel, ék kheueh hainyan hana gata teupeue?
11 Peucaya kheueh: Kamoe meututoenyoe keuhai peue nyang kamoe teupeue, dan kamoe meusaksi keuhai peue nyang ka kamoe kalon; teuma gatanyoe hana tatem teurimong keusaksian kamoe.
12 Gata hana tapatéh meunyoe ulôn calitra bak gata keuhai-hai nyang na lam donya nyoe; pakriban gata hase tapatéh, meunyoe ulôn peugah bak gata keuhai syeuruga?
13 Hana meusidroe pih nyang ka lheueh jiék lam syeuruga, seulaén Gobnyan nyang ka geutron lam donya, Gobnyan na kheueh Aneuëk Manusia.
14 Saban lagée Nabi Musa geupeuék uleue teumaga ateueh sibak kayée lam padang pasi, meunan cit deungon Aneuëk Manusia harôh teupeuék teuma,
15 mangat banmandum ureuëng nyang meuiman keu Gobnyan meuteumé udeb seujati dan keukai."
16 Sabab Po teu Allah lumpah that geugaséh keu manusia lam donya nyoe, nyang kheueh Gobnyan geubri Aneuëk Gobnyan nyang tunggai, mangat tieb-tieb ureuëng nyang meuiman ubak Gobnyan hana binasa, teuma meuteumé udeb seujati dan keukai.
17 Sabab Allah geu kirém Aneuëk Geuhnyan bukon keu jeuet keu hakém donya nyoe, teuma keu geupeu seulamat.
18 Ureuëng nyang meuiman bak Gobnyan hana teuhuköm. Teuma ureuëng nyang hana meuiman ka geuhuköm lé Po teu Allah, sabab jihnyan hana jimeuiman ubak Aneuëk Allah nyang tunggai.
19 Gobnyan jilakée ngon dasai jih hai nyang lagée nyoe: Trang nyan ka teuka lam donya, teuma manusia leubeh galak keu seupôt nibak trang, sabab buet awaknyan jeuhet.
20 Soemantong ureuëng nyang jipeubuet jeuhet, ureuëng nyan banci keu trang; ureuëng nyan hana jitem teuka ubak trang, mangat buet jih nyang jeuhet hana deuh teukalon.
21 Teuma ureuëng nyang peubuet keuheundak Po teu Allah, teuka ubak trang mangat jeuet sahéh bahwa peue nyang jipeubuet nyan na kheueh meunurot keuheundak Po teu Allah.
22 Óh ka lheuehnyan Isa dan murit-murit Gobnyan geujak u Yudea. Gobnyan tinggai disinan na padub watée treb jih ngon awaknyan dan geupumanö.
23 Nibak watée nyan Nabi Yahya gohlom jipeutamong lam glab. Gobnyan geupumanö gob di Ainon, hana padub na jiôh ngon Salim, sabab bak teumpat nyan jai that ié. Ureuëng ramé jijak bak gobnyan, dan gobnyan laju geupumanö awaknyan.
25 Na meupadubdroe murit Nabi Yahya jimeudakwa ngon ureuëng Yahudi keuhai atoran gleh.
26 Awaknyan laju jijak bak Nabi Yahya, dan jipeugah lagée nyoe, "Pak Gurée, peu kheueh Bapak mantong neuingat ureuëng nyang meusajan ngon Bapak di meurandeh Krueng Yordan nyan, nyang Bapak tunyok bak kamoe yoh masa ilée? Gobnyan bak saát teungoh geupumanö cit, dan banmandum ureuëng jijak bak Gobnyan!"
27 Geujaweueb lé Nabi Yahya, "Manusia hana jiteumé sapeue meunyoe hana geubri lé Allah keu jihnyan.
28 Gata keudroe ka tadeungoe ulôn peugah, 'Ulôn bukon Raja Peuseulamat. Ulôn geu-utus leubeh awai nibak Gobnyan.'
29 Dara barô na kheueh atra linto barô. Rakan linto barô nyan teuma jidong bak binéh sira jideungoe, dan jihnyan galak meunyoe jideungoe su teungku linto. Meunan cit teuma ngon ulôn. Bak saátnyoe ulôn galak lumpah na.
30 Gobnyan kheueh paleng peunteng, dan ulôn maken kureueng peunteng."
31 Nyang teuka nibak ateueh leubeh nibak peue mantong. Nyang teuka nibak lam donya jitamong lam kawöm ureuëng donya, dan jimeututoe keuhai-hai nyang na hubongan ngon donya. Gobnyan nyang teuka nibak ateueh leubeh nibak peue mantong nyang na.
32 Gobnyan geumeututoe keuhai nyang ka Gobnyan deungoe, teuma hana meusidroe pih nyang jitem patéh ateueh peue nyang ka geupeu saksi nyan.
33 Ureuëng nyang meuiman nibak keusaksian Gobnyan nyan, laju jipatéh bahwa Allah nyan na kheueh beutôi.
34 Sabab ureuëng nyang geu-utus lé Po teu Allah jipeusampoe tutoe haba nyang teuka bak Allah, sabab Roh Allah ka geubri bak gobnyan sipeunoh jih.
35 Bapak geugaséh keu Aneuëk Geuh, dan ka geuseurah banmandum kuasa bak Gobnyan.
36 Ureuëng nyang meuiman bak Aneuëk nyan teuma meuteumé udeb seujati dan keukai. Teuma ureuëng nyang hana taát keu Aneuëk nyan ureuëng nyan hana meuteumé udeb. Jihnyan geuhuköm lé Po teu Allah siumu masa.