Ezra

Chapter 4

Haba keuhai ureuëng-ureuëng nyang ka jiwoe nibak teumpat teuböih nyang teungoh jipeudong Baét TUHAN, Allah Israel, laju teudeungoe lé musoh ureuëng Yehuda dan Benyamin.
2 Sababnyan awaknyan laju jijak meurumpok deungon Zerubabel dan bubena ulée-ulée kawöm, óh ka meurumpok ngon awaknyan laju jiusui nyang lagéenyoe, "Tapeu idhin kheueh ubak kamoe mangat kamoe pih hase kamoe jak meusajan watée teupeudong Baét TUHAN nyan, sabab dikamoe pih meubakti ubak TUHAN Po teu Allah syedara, saban cit lagée syedara banmandum. Kamoe sabe kamoe peuseumah keureubeuen keu gobnyan yoh phon watée Esar-Hadon, raja Asyur nyang ba kamoe keunoe."
3 Teuma Zerubabel, Yesua dan ulée-ulée kawöm nyan geujaweueb, "Kamoe hana peureulée gata bantu keu kamoe peudong Baét TUHAN, Allah kamoe. Bah kheueh kamoe peudong keudroe lagée nyang geupeurintah lé Kores, raja Persia, ubak kamoe."
4 Óh lheuehnyan peunduduek nyang ka treb tinggai di nanggroe nyan ka jipeuphon peuleumoh seumangat ureuëng Yahudi dan jipeutakot-takot awaknyan mangat jeuet Baét TUHAN nyang teungoh jipeugöt nyan bék jeuet teupeugöt.
5 Awaknyan laju jisugok peujabat-peujabat peumeurintah Persia mangat geuyue piôh jipeugöt Baét TUHAN nyan dan geupeubateue reuncana ureuëng Yahudi nyan. Hainyan laju meulanjut simantong keurajeuen bak jaroe Raja Kores sampoe ubak keurajeuen geumat lé Raja Darius.
6 Bak awaiphon peumeurintahan Raja Ahasweros, musoh-musoh peunduduek Yerusalem dan Yehuda laju geutuléh surat gugatan.
7 Meunan cit nibak zamén keurajeuen Artahsasta, kaisar Persia, keujadian nyan meu-ulang lom: Bislam, Mitredat, Tabeel dan rakan-rakan awaknyan jituléh surat ubak raja. Suratnyan jituléh dalam basa Aram, dan harôh jiteujeumah bak watée geubaca.
8 Meunan cit lé Artahsasta na teuma geuteurimong surat keuhai Yerusalem. Suratnyan geukirém lé Gubunur Rehum dan Simsai seukeutareh propinsi dan jibantu lé rakan-rakan awaknyan, na kheueh lé hakém dan banmandum peujabat Persia nyang laén nyang asai jih nibak Erekh, Babel, dan Susan di nanggroe Elam,
9
10 meunan cit lé bansa-bansa laén nyang ka geuangkot lé Asnapar Nyang Agong dan jiyue tinggai teutab di banda Samaria dan di banda-banda nyang laén lam propinsi Efrat Barat.
11 Meunoe su surat nyan, "Ukeue nyang mulia Raja Artahsasta, nibak kamoe bubena hamba Teungku Amphon nyang tinggai di Efrat Barat. Saleuem.
12 Bah kheueh Teungku Amphon neumaklum, bahwa ureuëng Yahudi nyang ka jitinggai di wilayah-wilayah nyang laén didalam Keurajeuen Teungku Amphon, jinoenyoe jitinggai teutab di Yerusalem dan teungoh jipeudong lom banda nyang jeuhet dan galak that jibeurontak. Awaknyan ka jipeuphon lom jipeudong bintéh-bintéh beuton dan hana treb le ka seuleusoe jipeugöt atra nyan.
13 Meunyoe banda nyan ka seuleusoe jipeudong lom dan bintéh-bintéh beuton nyan ka lheueh jipeudong, peunduduek nyang na tinggai disinan hana jitemle jibayeue cukée, dan deungon na nyang lagéenyan hase nibak cukée keu keurajeuen akhé jih meukureueng.
14 Kamoe ka meu-utang budoe ubak Teungku Amphon dan hana ék kamoe ngieng meunyoe Teungku Amphon jipeurugoe, lé sababnyan, kamoe usui ubak Teungku Amphon,
15 mangat Teungku Amphon neuyue pareksa surat-surat peutinggai indatu Teungku Amphon. Nibak asoe surat tinggai nyan Teungku Amphon teuma neuteupeue bahwa banda Yerusalem keubit galak that jibeurontak dan yohphon ilée sabe jipeurugoe soemantong raja nyang mat peurintah ateueh propinsi nyan. Peunduduek disinan sabe payah that teupimpén. Nyang kheueh sabab jih banda nyan ka geupeuhanco.
16 Nyang kheueh, kamoe yakén that, meunyoe banda nyan jipeudong lom dan bintéh-bintéh beuton jipeudong teuma, Teungku Amphon hana meuhase le neukuasa propinsi Efrat Barat nyoe."
17 Raja laju geukirém jeunaweueb geuh lagéenyoe, "Keu Gubunur Rehum dan Simsai seukeutareh propinsi, meunan cit deungon rakan-rakan awaknyan nyang na tinggai di Samaria dan di banda-banda nyang laén nyang na tinggai di propinsi Efrat Barat. Saleuem.
18 Surat nyang ka lheueh gatanyoe kirém ka lheueh jiteujeumah dan jibaca dikeue ulôn.
19 Dan ateueh peurintah ulôn ka ulôn yue seulidek, dan keubit na bukeuti phon yoh jamén ilée Yerusalem sabe jilawan kuasa raja-raja dan le lamkawan peunduduek jih na kheueh peumbeurontak dan nyang kayém that ji peuna karu.
20 Ka lheueh lé raja-raja nyang peukasa geupeurintah ateueh propinsi Efrat Barat dan bansabohnyan dan jipeuna cukée ngon upeti.
21 Sabab nyan, tapeutreun kheueh peurintah mangat tayue piôh buet nyang teungoh jikeureuja lé awaknyan, mangat banda nyan bék jipeudong le sampoe ulôn peutron peurintah-peurintah nyang laén.
22 Tapeubuet laju peurintah nyang ka ulôn titah nyoe mangat bék meutamah geuhon le beuban ulôn!"
23 Meunan lheueh geubaca dikeue Rehum, Simsai dan rakan-rakan awaknyan surat nyang teuka nibak raja Artahsasta nyan, jijak laju awaknyan u Yerusalem dan jipaksa ureuëng Yahudi mangat bék jipeudong lé banda nyan.
24 Keuhai teupeubuet Baét TUHAN ka geupeupiôh dan hana jikeureuja sampoe nibak thon nyang keudua keurajeuen Darius raja Persia.