Marriage and sex

Dan TUHAN Allah laju geupeuéh manusia nyan sampoe teungét lagée ureuëng pangsan, teungoh mangat that teungét manusia nyan, TUHAN Allah laju geupeuteubiet sikrék tuleueng rusôk manusia nyan, inciek luka nyan laju geutôb ngon asoe. Nibak tuleueng rusôk nyan lé TUHAN Allah laju geupeujeuet sidroe ureuëng inong, óh lheueh nyan laju geuba lé Allah ubak manusia nyan. Dan jipeugah kheueh lé manusia nyan, "Nyoe pat jih, ureuëng nyang saban lagée ulôn -- tuleueng nibak tuleueng lôn, dan asoe nibak asoe lôn. Ulôn boh nan jihnyoe inong, sabab jihnyan teucok nibak ureuëng agam." Nyang kheueh sabab jih ureuëng agam jitinggai ma ngon yah jih, dan meusaboh ngon peurumoh jih, laju bandua jihnyan ka jeuet keusaboh.
Keujadian 2:21-24
Nabi Adam laju geumeusituboh ngon siti Hawa, peurumoh geuh nyan, dan inong nyan pih mume. Óh trok bak uroe laju lahé sidroe aneuëk agam dan laju geupeugah lé Nabi Adam, "Ngon tulông TUHAN ulôn ka meuteumé sidroe aneuëk agam." Dan laju geuboh nan aneuëk geuh nyan Kain. Nabi Adam dan peurumoh gobnyan na lom geumeu aneuëk sidroe teuk aneuëk agam. Geupeugah lé siti Hawa, "Allah ka geubri ubak ulôn aneuëk agam sibagoe geunantoe Habel, nyang ka jipoh maté lé Kain." Sabab nyan siti Hawa geuboh nan aneuëk geuh nyan Set.
Keujadian 4:1, 25
Teuma sabab raja geucok Sarai, TUHAN laju geupeutreun peunyakét nyang lupah parah ateueh raja nyan meunan cit ubak ureuëng-ureuëng nyang na lam meuligoe raja. Laju raja geucok Brahim dan geutanyong ubak gobnyan, "Peue nyang ka tapeubuet ateueh ulôn nyoe? Pakon hana gata peugah bahwa inong nyan peurumoh gata?
Keujadian 12:17-18
Sarai, peurumoh Brahim, gohlom cit meu-aneuëk. Teuma gobnyan na sidroe namiet ureuëng Meusé, sidroe aneuëk dara nyang nan jih Hagar. Sarai geupeugah ubak Brahim, "TUHAN hana geubri keumungkenan ulôn nyoe meuteumé lôn peulahé aneuëk. Sabab nyan, nyang gét jih droeneueh éh ngon namiet ulôn nyoe. Mungken jihnyoe jeuet jipeulahé aneuëk keu ulôn." Brahim situju lagée nyang guyue lé Sarai. Meunan kheueh Hagai geubri Sarai ubak Brahim mangat jeuet geucok keu selir. Bak watée nyan Brahim kana siploh thon di Kanaan.
Keujadian 16:1-3
Sidroe nibak awaknyan laju geupeugah, "Sikureueng buleuen teuk ulôn teuma lôn gisa. Dan bak watée nyan Sara peurumoh gata teuma jipeulahé sidroe aneuëk agam." Bak watée nyan Sara teungoh geudeungoe peue nyang jipeugah lé ureuëng nyan, Sara na dikeue pintoe khimah dilikot jamé, watée ureuëng nyang peugah haba. Nabi Ibrahim dan Sara ka tuha that, dan Sara ka hana le jiteuka he. Sabab nyan kheueh Sara teukém lam até geuh sira geupeugah, "Ulôn nyang ka tuha dan layée lagée nyoe, panena mungken lôn meujimak lom ngon lakoe lôn? -- Dan dilakoe lôn pih ka tuha saban lagée lôn."
Keujadian 18:10-12
Teuma Onan jiteupeue aneuëk-aneuëk jihnyan singoh hana jeuet jikuasa. Lé sababnyan, tieb-tieb jimeusibadan ngon balée aduen jih nyan, jipeubiyeu mantong ié mani jih rho uluwa mangat aduen jih hana jiteumé keuturonan. Sabab buet nyang lagée nyan, TUHAN beungéh lumpah na, dan TUHAN laju geupoh maté Onan nyan.
Keujadian 38:9-10
Bék gata peubuet mukah.
Keuluaran 20:14
Bék gata meuheut atra ureuëng laén: rumoh jih, peurumoh jih, namiet-namiet jih, beulatang peulara jih, keuleudée jih, atawa peue mantong atra ureuëng nyan."
Keuluaran 20:17
Bék gata hina ayah gata ngon cara gata meusituboh ngon peurumoh ayah gata nyang laén. Bék meusituboh ngon peurumoh ureuëng laén; buet nyang lagéenyan ka rhoh gata jeuet keu najih.
Imeum-Imeum 18:8, 20
Meunyoe na sidroe ureuëng Israel jimeumukah ngon peurumoh ureuëng saboh bansa ngon jih, ureuëng nyan ngon inong nyan harôh teuhuköm maté. Meunyoe na sidroe ureuëng agam jimeusituboh ngon ureuëng agam nyang laén, awaknyan ka jipeubuet buet nyang luwat dan hina, dan bandua ureuëng nyan harôh teuhuköm maté. Awaknyan maté sabab salah jih keudroe.
Imeum-Imeum 20:10, 13
Sidroe imeum hana jeuet jimeukawen ngon beukaih inong jeuhet atawa sidroe inong nyang hana le peurawan atawa nyang ka meucre, sabab imeum na kheueh milék Ulôn.
Imeum-Imeum 21:7
Jihnyan jeuet jimeukawen ngon sidroe inong nyang mantong peurawan nibak sukée jih keudroe. Dan hana jeuet jimeukawen ngon sidroe inong balée atawa sidroe inong nyang ka meucre, atawa beukaih inong jeuhet.
Imeum-Imeum 21:13-14
Meunan kheueh peuratoran jih meunyoe sidroe ureuëng lakoe ceumeuru dan curiga bahwa peurumoh jih nyan ka jipeubuet jeuhet deungon ureuëng agam laén dan jipeukuto droe jihnyan. Ureuëng agam nyan harôh jijak peuhadab binoe jihnyan ubak TUHAN dan di imeum harôh teuma geupeubuet peuratoran nyan u ateueh ureuëng nyan.
Teubileueng 5:29-30
"Miseu jih na sidroe ureuëng agam jimeukawen deungon sidroe aneuëk dara, dan watée hana jitemle ngon aneuëk inong nyan. Jihnyan ka jipeugét tudohan nyang peuleusu ngon jipeugah bahwa peurumoh jih nyan ka hanale peurawan bak watée jimeukawen ilée. Lam hai nyan di ureuëng syiek ureuëng inong nyan harôh kheueh jijak cok ija dara barô nyang na mantong incik darah, nyang jeuet keubukeuti bahwa aneuëk jihnyan bak watéenyan mantong na peurawan jih. Ija nyan harôh kheueh jitunyok ubak dumna teungku pemuka banda nibak kantô mahkamah. Ureuëng syiek di aneuëk dara nyan harôh kheueh jipeugah ubak awaknyan, 'Ulôn ka lôn seurah aneuëk ulôn keu ureuëng nyoe jeuet keupeurumoh jih, teuma jinoenyoe jihnyan ka hana jitueng le. Ka jitudoh nyang peuleusu deungon cara jipeugah bahwa peurumoh jihnyan ka hanale peurawan bak watée awaknyan jimeukawen. Teuma nyoe bukeuti jih bahwa aneuëk ulôn nibak watéenyan mantong na peurawan jih.
Kitab Teu-Ulang 22:13-17
"Miseu jih na sidroe ureuëng agam jimeukawen deungon sidroe aneuëk dara, dan óh lheuehnyan hana jigalakle sabab jihnyan jiteumé sapeue-sapeue nyang jiba malée keudroe ureuëng nyan. Lé ureuëng agam nyan laju jijok surat taleuek keu ureuëng inong nyan meunan cit jiuse teuma beukaih binoeji nibak rumoh jihnyan.
Kitab Teu-Ulang 24:1
Óh lheuehnyan Nabi Daud geupeu mangat lom até ureuëng inong gobnyan si Batsyeba, óh lheuehnyan laju geujak éh ngon binoe geuh nyan. Batsyeba laju geupeulahé lom sidroe aneuëk agam nyang geuboh nan Sulaiman lé Nabi Daud. TUHAN that-that geugaséh keu aneuëk nyan
2 Samuel 12:24
Sikeubitjih, Abia seumaken meukuasa. Bak gobnyan na
2 Tawarikh 13:21
Peurumoh gata lagée bak anggô nyang subô didalam rumoh gata. Aneuëk-aneuëk gata lagée tarôk bak zaiton di seukeulileng meuja gata.
Zabur 128:3
Sabab nyan, bahkheueh gata beumeubahgia deungon peurumoh gata keudroe; mita kheueh nekmat nibak aneuëk dara nyang ka gata meugatib -- aneuëk dara nyang lagak jeulita dan lincah lagée rusa. Bah kheueh tuboh jih nyang lagak nyan sabe lam keuadaan pungoe gila dan asmara jih sampoe teumabök-mabök gata.
Amsal 5:18-19
Banmandum nyan saban bahya jih lagée meumukah deungon peurumoh ureuëng laén. Soemantong nyang peubuet nyan hana teupeusie nibak huköman.
Amsal 6:29
Teuma pakriban kheueh deungon ureuëng agam nyang meuzina? Ureuëng nyan ka jireuloh droe jihnyan keudroe! Bangai that-that ureuëng nyan!
Amsal 6:32
Ureuëng nyang ka jimeukawen, nibak jihnyan na untông; peurumoh na kheueh karonya TUHAN.
Amsal 18:22
Rumoh dan hareuta hase meuteumé nibak ureuëng syiek, teuma peurumoh nyang bijaksana na kheueh karonya nibak TUHAN.
Amsal 19:14
Tinggai bak sagoe pageue leubeh mangat nibak tinggai meusapat deungon peurumoh nyang galak meudakwa.
Amsal 21:9
Rasa kheueh udebnyoe deungon peurumoh nyang gata gaséh seumantong gata udeb deungon sia-sia, nyang geubri lé Po teu Allah ubak gata di ateueh donya. Neunékmat kheueh tieb-tieb uroe bahpih hana meuguna. Sabab upah jeureh payah gata nyang kheueh atranyan mantong.
Peungkhotbah 9:9
Neucöm kheueh ulôn deungon bibi gata; cinta droeneueh leubeh nékmat nibak anggô!
Seulaweut Agong 1:2
Jaroe wie gobnyan geupeusadeu nibak ulée lôn, dan jaroe uneuen gobnyan geuwa nibak lôn.
Seulaweut Agong 2:6
Bôh mom gata lagée dua bôh aneuëk rusa, aneuëk keumbeu rusa nyang teungoh rot naleueng lamkawan bungöng-bungöng bakong. Gata neutawan até ulôn, adek lôn sayang, dara barô bang, gata neutawan até lôn deungon keunalon mata gata, deungon peumata indah nyang na bak talo takue gata. Padubna nékmat cinta gata, wahai adek lôn, dara barô bang, jiôh leubeh nékmat nibak ié anggô. Minyéuk gata meubhée meuhayak, leubeh mangat bhée nibak meubagoe rupa reumpah-reumpah nyang na.
Seulaweut Agong 4:5,9,10
Yerusalem, yoh watée ilée gata lagée inong malée, nyang hana hase teupeulahé aneuëk. Teuma bak saát nyoe meusurak kheueh, dan meuca-e kheueh deungon geumbira! Sabab aneuëk-aneuëk gata jai lumpah na, leubeh le nibak aneuëk ureuëng inong nyang hántom jitinggai lé lakoe.
Nabi Yesaya 54:1
TUHAN meufeureuman, "He umat nyang hana seutia, tawoe kheueh ubak Ulôn! Gata na kheueh milék Ulôn. Ulôn ku cok gata, sidroe nibak tieb-tieb banda, dua droe nibak tieb-tieb kawöm, dan Lôn puwoe gata keudeuh u Bukét Sion.
Nabi Yeremia 3:14
Sabab nyan, bandum mantan geunaséh gata Lôn peusapat, bah kheueh nyang gata galak meunan cit nyang gata banci. Awaknyan jidong jihudöm gata bansieseun lingka dan jisuet banmandum peukayan gata, sampoe awaknyan hase jingieng tuboh gata nyang ka teulon nyan.
Yehezkiel 16:36-37
Watée TUHAN phon-phon geumeufeureuman ubak bansa Israel deungon peurantaraan ulôn, TUHAN geupeugah, "Hosea, tameukawen kheueh deungon sidroe ureuëng nyang galak bak buet meumukah, dan aneuëk-aneuëk gata jeuet cit lagée jih nyan. Umat Ulôn saban lagée peurumoh gata nyan; awaknyan hana seutia ubak Ulôn, dan jitinggai Ulôn."
Hosea 1:2
TUHAN meufeureuman, "He aneuëk-aneuëk Ulôn, ma gata bukon peurumoh Lôn le, dan Ulôn bukon lakoe gobnyan. Sabab nyan, jak peukara kheueh jihnyan mangat jihnyan bék le jipeubuet mukah dan bék le jimeujeuhet.
Hosea 2:2
"Na cit peulajaran lagée nyoe: tieb-tieb ureuëng nyang jitaleuek peurumoh jih, harôh jijok surat taleuek ubak inong nyan. Teuma jinoenyoe Ulôn peugah ubak gata: barang sigasoe nyang taleuek peurumoh jih padahai peurumoh jih nyan hana jimeumukah ngon agam laén, teupeusabab peurumoh jih nyan ka meumukah, meunyoe peurumoh jih nyan jimeukawen lom. Dan barang sigasoe nyang meukawen ngon inong nyang ka teutaleuek nyan, teuma nyan ka jimeumukah."
Matius 5:31-32
Dan óh ka lheueh nyan Gobnyan geupeugah, 'Nyan kheueh sabab jih di ureuëng agam jitinggai mak ngon yah laju jijak meusaho ngon peurumoh jih, teuma bandua nyan ka jeuet keusaboh.' Teuma awaknyan kon lé dua droe, teuma sidroe. Nyan kheueh sabab jih peue nyang ka geupeu saboh lé Po teu Allah hana jeuet jipeu cre lé manusia."
Matius 19:5-6
Dan tieb-tieb ureuëng nyang ka jitinggai rumoh, atawa syedara agam meunan cit deungon nyang inong, atawa mak ngon yah, atawa aneuëk miet, atawa lampôh meusabab lé Ulôn, keu ureuëng nyan teuma jiteurimong lom sireutôh go ganda. Dan gobnyan teuma jiteurimong udeb seujati dan keukai.
Matius 19:29
"Bapak Gurée," kheun awaknyan, "Nabi Musa na geupurunoe lagée nyoe: Meunyoe sidroe ureuëng agam meuninggai donya, dan ureuëng nyan hana meu-aneuëk, syedara gobnyan harôh meukawen ngon ureuëng inong balée nyan mangat jibri keuturonan keu ureuëng nyang ka meuninggai nyan. Sabab meunyoe ureuëng maté óh trok bak watée jibeudôh lom teuma, awaknyan hana teuma jimeukawen lé, teuma awaknyan teutab udeb lagée malaikat lam syeuruga.
Matius 22:24, 30
"Nabi Musa geubri ureuëng jitaleuek peurumoh jih asai jibri surat taleuek leubeh ilée," jaweueb awaknyan. "Nabi Musa geupeurintah lagée nyan sabab gata payah that teupeurunoe," Kheun Isa ubak awaknyan. "Teuma bak awaiphon, watée Allah geucebta manusia, Allah geupeugah lagée nyoe, 'Allah geucebta agam ngon inong. Nyang kheueh sabab jih ureuëng agam jitinggai ma ngon yah jih dan laju udeb meusajan ngon peurumoh jih, teuma mandua nyan ka jeuet keusaboh, teuma, awaknyan kon le dua droe, ka jeuet keu sidroe.' Nyang kheueh sabab jih, peue nyang ka geupeu saboh lé Po teu Allah, nyan hana jeuet jipeucre lé manusia!"
Markus 10:4-9
Meunan cit inong nyang taleuek lakoe jih laju jijak meukawen ngon agam nyang laén, jihnyan pih ka jimeumukah."
Markus 10:12
Na teuma sidroe nabi inong nyang ka tuha lumpah na. Nan nabi nyan Hana, binti Fanuel, asai nibak sukée Asyer. Óh ka lheueh tujoh thon geumeukawen,
Lukas 2:36
"Meunyoe gata na jitawök bak teumpat ureuëng meukawen, bék kheueh gata duek bak kurusi teuhoreumat. Pat tateupeue ureuëng laén nyang leubeh peunteng nibak gata pih na jitawök,
Lukas 14:8
Manusia jimakheun ngon jijieb ié, jimeukawen; meunan kheueh sabe hana putôh-putôh sampoe Nabi Nuh geutamong lam kapai laju ié raya teuka dan habéh jipeubinasa banmandum ureuëng nyan.
Lukas 17:27
Laju Isa geubeuôt ulée geuh dan geupeugah bak inong nyan, "Ho ka awaknyan banmandum? Peu kheueh hana nyang huköm gata?" "Hana Pak," jaweueb inong nyan. "Meunyoe meunan bah kheueh," kheun Isa, "Ulôn pi hana lôn huköm gata. Jinoenyoe jak kheueh, bék tapeubuet desya le."
Yahya 8:10-11
Sidroe ureuëng inong nyang na lakoe, miseue jih, teuikat ngon huköm bak lakoe jih seumantong lakoe jih udeb. Meunyoe lakoe jih ka meuninggai donya, peurumoh ureuëng nyan ka beubaih nibak huköm nyang teuikat jihnyan bak teungku lakoe. Meunyoe inong nyan udeb ngon agam laén seudangkan lakoe jih mantong udeb, dan ureuëng inong nyan teupeugah ka meumukah. Teuma meunyoe lakoe jih meuninggai donya, seucara huköm, inong nyan ka beubaih. Dan meunyoe inong nyan jimeukawen lom ngon agam laén, inong nyan hana teupeugah meumukah.
Roma 7:2,3
Ulôn ka kuteurimong laporan bahwa lamkawan gata na nyang kajipeubuet buet-buet nyang cabui biet-biet luwabiasa: Na ureuëng lamkawan Gata nyang jimeumukah ngon ma ui jih. Ureuëng-ureuëng nyang hana jituri Tuhan mantong hánjipeubuet nyang lagée nyan! Bah kheueh ka lagée nyan, Gata mantong cit manyang até. Nyang sibeuna jih Gata seudeh, dan Gata peuteubiet lamkawan Gata ureuëng nyang peubuet lagée nyan.
1 Korintus 5:1, 2
Peu kheueh gata teupeu bahwa ureuëng-ureuëng nyang hana jipatéh kheun Allah, hana teuma jeuet keu anggota umat Allah? Bék keunong peungeuet! Ureuëng-ureuëng nyang peubuet cabui, ureuëng-ureuëng seumah beurala, nyang meumukah, nyang peubuet-buet nyang that-that malée ateueh ureuëng sabe jeunéh, nyang ceumeucue, nyang leuha, tukang mabök, nyang galak peubrok ureuëng laén, dan ureuëng nyang meulakée ngon paksa atra ureuëng laén -- banmandum ureuëng nyang lagée nyan hana teuma jeuet keuanggota umat Allah.
1 Korintus 6:9-10
Allah ka geubloe gata dan ka geubayeue ngon lunaih. Sabab nyan, peuguna kheueh tuboh gata lagée nyan bagoe sampoe Allah teupeumulia.
1 Korintus 6:18-20
Jinoenyoe ulôn keuneuk peugah haba keuhai nyang gata peugah lam surat gata. Meunyoe sidroe ureuëng agam hana meukawen, nyan gét. Teuma mangat bék teupeudaya ngon hai-hai nyang hana patot, leubeh gét sidroe ureuëng agam na purumoh jih keudroe dan tieb-tieb inong na lakoe jih keudroe.
1 Korintus 7:1, 2
Ureuëng lakoe harôh jipeupeunoh keuwajéban jih sibagoe lakoe keue purumoh jih, dan di purumoh harôh teuma jipeupeunoh keuwajéban jih sibagoe purumoh keue lakoe; maséng-maséng jipeupeunoh keuwajéban jih ateueh ureuëng laén. Purumoh hana meukuasa ateueh tuboh jih keudroe; nyang meukuasa ateueh tuboh jih na kheueh lakoe. Meunan cit lakoe hana meukuasa ateueh tuboh jih keudroe; nyang meukuasa ateueh tuboh jih na kheueh purumoh. Bék kheueh peujiôh sidroe ngon nyang laén seusabe lakoe binoe. Jeuet mantong meunyoe sikeujab, asai ateueh situju ban dua blaih pihak. Ngon lagée nyan maséng-maséng meuteumé meudoá ngon cara hana teuganggu. Teuma óh lheueh nyan bah kheueh gata saléng tameurab lom sibagoe ureuëng meulakoe binoe. Meunyoe hana lagée nyan, singoh gata teuma jisáh lé roh jeuhet, sabab gata hana teuga tapeuteun hawa nafeusu.
1 Korintus 7:3-5
Keu ureuëng-ureuëng nyang gohlom meukawen dan keu ureuëng-ureuëng inong nyang ka balée, nyoe kheueh naseuhat ulôn: Leubeh gét Gata teutab udeb lagée ulôn. Teuma meunyoe Gata hana hase tapeuteun nafeusu, bah kheueh Gata meukawen. Sabab leubeh gét Gata meukawen nibak nafeusu gata meuhuéb-huéb lagée apui hu. Keu ureuëng nyang ka meukawen, nyoe kheueh peurintah ulôn: (Nyang sibeuna jih kon ulôn nyang bri peurintah nyoe, teuma na kheueh Tuhan.) Sidroe ureuëng inong nyang ka meukawen bék kheueh jitinggai lakoe jih. Teuma meunyoe inong nyan ka jitinggai lakoe jih, inong nyan bah kheueh teutab hana meulakoe, atawa jigisa ubak lakoe jih. Dan sidroe ureuëng lakoe hana jeuet jitaleuek purumoh jih.
1 Korintus 7:8-11
Sabab lakoe nyang hana meuiman teupeulayak jeuet keu anggota umat Allah sabab purumoh jih nyan ka jeuet keu milék Allah. Meunan cit keu purumoh nyang hana meuiman teupeulayak jeuet keu anggota umat Allah, sabab jimeukawen ngon lakoe nyang ka jeuet keu milék Allah. Meunyoe hana lagée nyan, aneuëk-aneuëk awaknyan jeuet keu aneuëk-aneuëk kaphe, padahai aneuëk-aneuëk nyan teuanggab sibagoe anggota umat Allah.
1 Korintus 7:14
Ulôn meuharab that mangat Gata leupah nibak keusosahan. Ureuëng nyang hana meupurumoh teuma jipusat pikeran jih ubak hai-hai keu Tuhan, sabab jih jikeuneuk peumangat até Tuhan. Teuma ureuëng nyang ka na purumoh jai that-that jipike keuhai donya nyoe, sabab jihnyan keuneuk jipeumangat até purumoh jih; ngon lagée nyan, peuratian ureuëng nyan ka teuweuek-weuek. Sidroe ureuëng inong nyang hana meulakoe, atawa sidroe aneuëk dara, teuma jai that jipike keu hai Tuhan, sabab jihnyan meuharab that mangat jeuet jiwaraga jih keu milék Allah. Teuma sidroe ureuëng inong nyang ka meulakoe, jipeusaho pikeran jih ubak hai-hai donya, sabab jih nyan jikeuneuk peumangat até lakoe jih.
1 Korintus 7:32-34
Sidroe ureuëng inong nyang ka meukawen jihnyan teuikat ubak lakoe jih simantong lakoe jih nyan udeb. Meunyoe lakoe jih ka meuninggai donya, inong nyan beubaih jimeukawen lom ngon ureuëng nyang jigalak; asai jimeukawen nyan seucara Kristen.
1 Korintus 7:39
Bék kheueh jeuet keu ureuëng nyang meurakan ngon ureuëng-ureuëng nyang hana meuiman keu Isa; nyang lagée nyan hana paih. Panena mungken nyang gét meulawok ngon nyang jeuhet! Hana mungken trang meujampu ngon supot.
2 Korintus 6:14
Keuheundak tabiát manusia deuh that nibak buet-buet nyang cabui, kutoe dan hana patot; nibak teuseumah beurala dan iéleumé guna-guna; nibak meumusoh-musoh, meulo, bingiek até, bagaih beungéh, dan teupeupeunteng droe keudroe; peupeucahan dan meudong-dong siblaih, meunan cit picék até, mabök-mabök, meugura-gura dan laén-laén sibagoe jih. Keu banmandum nyan ulôn peuingat gata jinoenyoe lagée nyang ka lôn peuingat gata yoh masa ilée, bahwa ureuëng-ureuëng nyang jipeubuet hai-hai nyang lagée nyan hana teuma jeuet keuanggota umat Allah. 22 Teuma, meunyoe ureuëng-ureuëng nyang jipimpén lé Roh Allah, hase jih na kheueh lagée nyoe: Awaknyan saléng na gaséh sayang, awaknyan sabe lam geumbira, até awaknyan teunang, awaknyan saba dan meubudho basa, awaknyan gét ateueh ureuëng laén dan awaknyan seutia,
Galatia 5:19-21
Gata na kheueh umat Allah. Sabab nyan, buet-buet nyang cabui dan hana patot teupeubuet, meunan cit ngon leuha, nyang lagée nyan hana jeuet na lamkawan gata. Bék sampoe na ureuëng laén jeuet keualasan keujipeugah bahwa gata katapeubuet hai-hai nyang lagée nyan.
Efesus 5:3
Purumoh, tundok kheueh ubak lakoe, lagée ubak Tuhan. Sabab lakoe na kheueh ulée ateueh purumoh jih, saban lagée Almaseh panghulée ateueh jeumaáh dan Gobnyan keudroe na kheueh Raja Peuseulamat ateueh jeumaáh nyang jeuet keutuboh geuh. Saban lagée jeumaáh tundok ubak Almaseh, meunan cit ngon peurumoh lam sigala hai tundok ubak lakoe. Lakoe, gaséh kheueh keupurumoh gata, saban lagée Almaseh geugaséh jeumaáh dan geukeureubeuen droe Gobnyan keu jeumaáh nyan keudroe. Almaseh geupeubuet lagée nyan mangat Gobnyan jeuet geupeu gleh jeumaáh nyan ngon ajaran Gobnyan dan rot ié pumanö, mangat óh lheueh nyan Gobnyan hase geujok ubak Allah. Ngon lagée nyan Almaseh ka geupeujeuet jeumaáh nyan teudong ngon agong dan murni dikeue Gobnyan, deungon hana cacat cupa mubacut pih. 28 Meunan kheueh teuma lakoe beujigaséh keupurumoh saban lagée jigaséh tuboh jih keudroe. Ureuëng nyang gaséh keupurumoh jih saban cit lagée ka jigaséh keu droe jih keudroe. ( Hántom na ureuëng nyang jibanci keu tuboh jih keudroe. Sikeubiet jih, jipeulara dan jijaga lagée Almaseh geupeulara jeumaáh Gobnyan. Tanyoe tateupeue nyan, sabab tanyoe na kheueh anggota-anggota tuboh Almaseh.) Lam Alkitab na teutuléh lagée nyoe, "Sabab nyan sidroe ureuëng agam jitinggai bapak ngon ma jih keujijak meusaboh ngon purumoh jih, dan bandua awaknyan teuma jeuet meusaboh." Ayat nyan keubiet lhok that makna jih. Dan lôn peusangkot hainyan ngon hubongan Almaseh ngon jeumaáh. Teuma ayat nyan na hubongan jih ngon gata: Bah kheueh tieb-tieb lakoe jigaséh keupurumoh jih dan jigaséh teuma keu droe jih keudroe meunan cit tieb-tieb purumoh bah kheueh jiuseuha jihoreumat keu lakoe jih.
Efesus 5:22-33
Sabab nyan, peumaté kheueh nyang jimeuheuet le donya nyan jipeukaru droe gata, lagée buet cabui, hai-hai nyang hana teupujoe, hawa nafeusu, meulakée nyang jeuhet, dan seurakah (sabab seurakah nyan na kheueh saban lagée teuseumah beurala).
Kolose 3:5
Nyoe kheueh keuheundak Po teu Allah: Mangat gata udeb khusos keu Gobnyan, gleh, tapeujiôh mandum buet nyang cabui. Tieb-tieb ureuëng agam nyang na lamkawan gata meuseuti jiteupeue pakriban udeb meusajan ngon purumoh jih ngon cara nyang teupeumangat até Allah dan manusia. Bék udeb meunurot hawa nafeusu ateueh purumoh gata, lagée nyang jipeubuet lé ureuëng-ureuëng nyang hana jituri Allah.
1 Tesalonika 4:3-5
Sidroe ureuëng nyang jeuet keupeunilék jeumaáh ureuëng nyan hana meucupa, peurumoh jih sidroe mantong, ék jiteun droe, bijaksana, dan teureuteb; ureuëng nyan jitem teurimong gob dirumoh jih, dan hase jipeurunoe ureuëng laén; Peumbantu jeumaáh museuti sidroe mantong peurumoh geuh. Ureuëng nyan museuti carông jiatoe aneuëk-aneuëk jih dan rumoh tangga jih ngon jroh.
1 Timotius 3:2, 12
Sidroe peupeumimpén jeumaáh na kheueh sidroe ureuëng nyang hana meucupa; ureuëng nyan peurumoh jih sidroe mantong; aneuëk-aneuëk jih nyang ka meuiman ubak Almaseh dan kon aneuëk nyang jeuhet hana jeuet teupurunoe.
Titus 1:6
Banmandum ureuëng harôh jitunyok sikeub horeumat ubak leumbaga meukawen, nyang kheueh sabab jih lakoe binoe beuseutia sidroe ngon nyang laén. Ureuëng nyang cabui dan ureuëng nyang meumukah teuma geupeue sidang lé Po teu Allah.
Ibrani 13:4
Dan meunan cit gata, hei teungku-teungku lakoe, bah kheueh gata udeb ngon peunoh peungeurtian ateueh purumoh gata, dan ngon sadar bahwa awaknyan na kheueh kawöm nyang leumoh. Peusaneut kheueh awaknyan deungon horeumat, sabab awaknyan meusajan-sajan ngon gata, teuma jiteurimong anugeurah udeb nyang seujati nibak Allah. Peubuet kheueh nyoe, mangat hana nyang ampeung doá gata.
1 Petrus 3:7
Teuma nyoe nyang brat até Lôn ateueh gata: Gata tabri até keu Izebel, sidroe inong nyang jiaku droe utosan Allah. Ka jai that hamba-hamba Lôn nyang jipeungét dan jipurunoe beujitem peubuet cabui dan beujitem pajoh peunajoh nyang ka jipeuseumah ubak beurala.
Wahyu 2:20
Meunan cit awaknyan hana teuma jitinggai buet-buet jih nyang jeuhet, na kheueh jipoh maté gob, jingui iéleumé-iéleumé gaéb, buet cabui dan ceumeucue.
Wahyu 9:21
Hakém nyang ade lom bijaksana! Gobnyan ka geupeu rhot huköman ateueh inong lunte nyang rayeuk, nyang peurusak donya ngon buet jih nyang cabui. Po teu Allah ka geuhuköm inong lunte nyan, sabab jihnyan jipoh maté hamba-hamba Allah." 3 Laju su ureuëng nyang subra nyan jipeugah lom, "Pujoe kheueh Allah! Asab nibak apui nyang jipeuhangôh banda rayeuk nyan teuma meuhúb-húb hana piyôh-piyôh!"
Wahyu 19:2